Mumbai, Naitung:
Ka ïingbishar ba kyrpang jong ka National Investigation Agency (NIA) ha ka Sngi Palei ka la pyllait lut ïa baroh hynñiew ngut kiba shah kynnoh ha ka kam pynbthei bom ha Malegaon ha u snem 2008, kynthup ïa ka MP barim ka BJP ka Pragya Singh Thakur bad u Lt Col Prasad Purohit.
Kaba kham pawnam ka long ba hynriew ngut ki briew ki la ïap bad palat 100 ngut ki la mynsaw haba u tiar pynbthei uba la teh ha ka thuk thuk u la bthei hajan kawei ka jaka mane blei ki Muslim ha Malegaon, ka shnong kaba don ha ka thaiñ ba shaphang Shatei jong ka Maharashtra, ha ka 29 tarik, Nailur, 2008.
U Lt Col Purohit, ka Pragya Thakur, u Major (ba la shongthait) u Ramesh Upadhyay, u Ajay Rahirkar, u Sudhakar Dwivedi, u Sudhakar Chaturvedi bad u Sameer Kulkarni ki la don hapoh ka jingbishar ha katei ka mukotduma katkum ki kyndon jong ka Unlawful Activities (Prevention) Act, ne UAPA, bad ka Indian Penal Code (IPC).
Ka ïingbishar jong ka NIA haba pynbna ïa ka rai ka la ïohi ba ka liang pynngat kam shym la lah ban pynshisha ia ka mukotduma, da kaba bynrap ba ki nongshah kynnoh ki dei hok ban ïoh jingmyntoi na ka jingartatien.
Ka kashari ka la ong ba ïa ki bahaïing jong baroh hynriew ngut ki lanot kiba la ngat ha ka jingjia shah pynbthei yn ai pisa mar T.2 lak bad ïa baroh kiba mynsaw yn ai mar T.50,000 kum ka bai lutksan.
