Hyderabad, Nailar:
Ka kynhun Narcotics Control Bureau (NCB) ha ka sngi Balang ka la ïoh kurup 400 kg u drok Hydroponic na ki jingkit jong kawei ka kynthei kaba shong ha ka kad liengsuiñ Rajiv Gandhi International Airport hangne, ong ka khubor ba la pynmih da ka sorkar.
La antad ba ka dor jong une u Ganja kan kot sha ka 40 klur tyngka, ong ka jingpynbna ba la pynmih da ka NCB.
Da kaba leh katkum ki jingtip ba la ïoh na ki bor wad bniah, ki heh jong ka NCB ki la bat ïa ka kynthei nongleit nongwan bad ki la kurup 400 kg ïa ki marbam ba la shah khang ban pynïaid na ki ar tylli ki pla jong ka, la ong ka khubor.
Ha ka jingtohkit la lap ba katei ka longkmie ka la thied ïa katei ka jingdih ba la khang na Bangkok bad ka la leit phai biang sha India lyngba ka Dubai ban lait na ka jingsuba namar ki la don bun ki khep ba la lap ia u drok Hydroponic na ki nongleit nongwan kiba wan beit na Bangkok sha ki kad liengsuiñ bapher bapher jong ka ri India, la ong ka NCB.
Ka jingtohkit kaba kham bniah ka dang ïaid shakhmat ban lap ïa ka jingïadei jong kane ka longkmie ha Thailand bad ruh ha India, la ong ka khubor.
