Mumbai, Nailar:
Kawei u nonghikai shimet ha ka thaiñ Malad ha Mumbai ka la shah pynngat ha ki kyndon aiñ hadien ba ka la thang ïa ka kti jong uwei u khynnah skul uba dang 8 snem ka rta da u mombati ba meh kum ka jingpynshitom namar ka jingbym biang ka jingthoh dak jong u, la ong ki pulit.
Kane ka jingjia ka la jia ha ka janmiet jong ka 28 tarik, Naitung ha ka ïingsah jong ka Rajshree Rathore kaba dei ka nonghikai Tuition kaba sah ha JP Decks Building ha Malad East.
Une u khynnah rit ïa uba la tip kyrteng kum u Mohammad Hamza Khan, uba shong ha ka klas 3 jong ka Lakshadham School, u ju leit tista shaka jaka khreh kot ha ka por janmiet ha ïing jong ka Rathore naduh ka por 7 baje janmiet haduh ka por 9 baje mynmiet. Katkum ka jingïathuh jong u kpa jong utei u khynnah, u Mustakeen Khan, 50 snem ka rta, ka hynmen jong u Hamza ka Rubina ka la leit buh ïa u sha ka jaka khreh kot man ka sngi.
Ha ka por kumba 9 baje eiei mynmiet, ka Rathore ka la phone ïa u Khan, da kaba pyntip ba u Hamza u ïam khlem lah pyn-en shuh bad donkam ban leit shaw mardor ïa u. Mar ïa wan phai sha la ïing, u Hamza u la ïathuh ba ka nonghikai jong u ka la bat ïa ka kti jong u halor ka ding ba men na u mombati kum ka jingpynshitom ïa ka jingbym bha dak thoh jong u, kaba la pynlong ïa u ban shah thang na ka kti kamon.
Khlem da pynslem la pynkit mar mar ïa u Hamza sha u doktor shwa ban pynkynriah sha Babasaheb Ambedkar Hospital (Shatabdi) na ka bynta ban ïoh ïa ka jingsumar kaba hashwa. Hadien ka jingujor ba la ujor da u Khan, ki pulit ki la buh jingmudui ejahar pyrshah ïa ka Rathore.
Ka jingtohkit kaba bniah halor kane ka jingjia ka dang ïaid shakhmat, la ïathuh ki pulit.
