New Delhi, Nailar:
U heh nongïalam jong ka seng Congress u Rahul Gandhi, un kyrshan ïa ka jingpule jong ki 22 ngut ki khynnah, kiba la duh noh ïa ka kmie ne u kpa ne ïa baroh ar, ha ka jingther bom jong ka Pakistan, ha shi lynter jong u Line of Control (LoC) ha Poonch distrik jong ka Jammu & Kashmir, ha ka por jong ka Operation Sindoor, ong uwei u nongïalam ka seng.
U President ka Jammu and Kashmir Congress Committee u Tariq Hameed Karra ruh u la kyntait ïa kino kino ki jingïapher jingmut bad ka kynhun ba ïatreilang hashwa ka jingthep vote ka National Conference (NC) hynrei u la ong ba ka seng jong u ka dang ap ïa ka jingthaw ïa ka Coordination Committee bad ka seng synshar ha kine ki hynñiew bnai ba la dep.
“Ka jingïap jong ki riew paidbah bad ki jingjulor jong ki jingdon jingem ka la jia ha Poonch bad Rajouri (hapdeng ka 7 bad 10 tarik u Jymmang) ha ka jingshah ther bom ha ka Pakistan. Katkum kane ngi la aiti ïa ka thup sha u,” la ong u Karra, uba la poi sha Rajouri ha ka jingleit jngoh ïa katei ka thaiñ, ha kine ki khyndiat sngi ba la leit. U la ong ba ka seng ka don ïa ka thup jong ki 22 ngut kum kine ki khynnah tang ha Poonch distrik, bad lah ban pynrung shuh shuh ïa kum kine ki khynnah ha kaba kut jong ka jingleit jngoh kaba lai sngi.
Ka Poonch distrik marwei ka la don 13 ngut ki riew paidbah kiba la ïap napdeng ki 28 ngut kiba la ïap ha ka jingshah ther bom bad thombor da ki Drone jong ka Pakistan ha Jammu & Kashmir hadien ba ki shipai India ki la pynlong ïa ki jingsiat Missile ïa ki jingtei jong ki lehnoh ha shiliang khappud hapoh ka jingtreikam jong ka Operation Sindoor ha u bnai Jymmang ha kaba ïadei bad ka jingjia thombor jong ki lehnoh kaba la jia ha ka 22 tarik, Ïaïong ha Pahalgam ha kaba ka la shim ïa ka jingim jong ki 26 ngut ki briew, ha kaba kham bun na kiba la shah pynïap ki dei ki nongjngohkai pyrthei.
U Karra u la ong ba u dang leit jngoh ïa ka Poonch ha ka sngi Ba-ar ban aiti ïa ka jingïarap pisa ba la phah da u nongïalam ka liang pyrshah na ka bynta ki khynnah kiba shah ktah na ka bynta ka jingpule jong ki.
“Kane ka dei ka jingthmu ban kner ïa ka kti kadiang ka kti kamon sha ki khynnah khnang ba ka jingpule jong ki kan ym shah ktah,” u la ong.
