Amaravati, Nailar:
Ka sorkar Andhra Pradesh ka la buh ïa ka thong kaba khraw ban pynlong ïa ka State Secretariat kaba lait luid na ki plastik ba pyndonkam tang shisien ha ka 15 tarik Nailat, 2025, bad ka thmu ban pynjlan ïa kane ka jingkhang ha baroh kawei ka jylla hapoh ka 5 tarik, Jylliew, 2026.
Kane ka jingthmu ka long hadien ka jingkhot na u Myntri Rangbah ka jylla u Nara Chandrababu Naidu ban kyntiew ïa ka jingpynneh pynsah ïa ka mariang bad ban ïada ïa ka koit ka khiah jong ki paidbah.
U Principal Secretary jong ka Municipal Administration and Urban Development (MA&UD) u S Suresh Kumar u la pynbna ïa kane ka jingthmu ha ka jingïalang ai jinghikai ïa ki Mandal Liaison Officer (MLO) ha ka sngi Thohdieng.
U la pynpaw ïa ka jingma jong ki plastik ba pyndonkam tang shisien, da kaba kdew ïa ka jingjaboh jong ki plastik kiba rit kum ka jingma kaba nang kiew kaba ïadei bad ki jingpang bampong bapher bapher bad ki jingma ïa ka koit ka khiah jong ki briew bad ki mrad.
Kum shi bynta ban shimkhia mardor, yn khang pyrshah ïa ka jingdie bad jingpyndonkam ïa ki bilor plastik, ki khuri, ki pliang, ki Sachet, ki Sticker, bad ki pla kit mar hapoh Secretariat. Yn buh ïa ki jaka pynmih um RO ha baroh ki block, bad ki nongtrei kin ïoh ïa ki bilor Steel.
Yn pynrung ruh ïa ki jaka bret jaboh kiba don lai rong na ka bynta ban pynïakhlad la kajong kajong ki jaboh.
U MD ka Swachh Andhra Corporation u B Anil Kumar Reddy u la ong ba la thaw ïa ka Secretariat Plastic-Free Task Force hapoh ka jingïalam jong u Principal Secretary ka GAD ban peit ïa kane ka jingpyntreikam.
Ka jinghikai ïa ki MLO bad ki nongdie jingdie ka la dep ban pyndep.
Ki jingpynbna kin sdang ha ka 5 tarik u Nailat, ka jingpyntreikam shi bynta kan sdang ha ka 11 tarik u Nailar, bad ka jingkhang ba pura kan treikam ha ka 15 tarik u Nailar.
Ki heh sorkar ki la kyrpad ïa baroh ki nongtrei jong ka Secretariat ban kyrshan ïa kane ka jingthmu da kaba shim ïa ki lad ki lynti kiba ïadei bad ka mariang, da kaba buh ïa ka Secretariat kum ka nuksa na ka bynta ka jingthmu ba kham heh jong ka Andhra Pradesh ban pynduh noh ïa ki plastik ba pyndonkam tang shisien ha u snem 2026.
