Chandigarh, Nailar:
Ki shipai ka tnat Border Security Force (BSF) kiba peitngor bha ki la pynduhjait ïa ki jingpyrshang ban rung tuh sha shiliang pud ha khappud jong ka Punjab, da kaba kem ïa arngut ki nongkhaïi drok ha Tarn Taran bad ïoh kurup ïa ki katto katne ki Drone bad ki song jong u drok Heroin ha ki jingjia bapher bapher, ong ka jingpynbna jong ki BSF ha ka sngi U Blei.
Ha ka jingjia kaba nyngkong eh ha ka step Sngi U Blei, ki shipai BSF kiba la pynkhreh bha ki la pynlong ïa ka jingkhynra hadien ba ki la ïohi ïa ka jingher jong ki drone hajan ka shnong Kalsian ha Tarn Taran. Ki la jop ban kem ïa arngut ki nongkhañi tuh kiba rieh ha kawei ka lyngkha kba. Shuh shuh, ha ka jingpynpaw jong ki, ki shipai ki la kurup kawei ka song jong u drok heroin.
Ïa kane ka song jong u drok la sop da ka tape kaba rong stem, kaba pynithuh ba la pynhap na ka Drone.
Ha kawei pat ka jingjia, ha ka sngi Saitjaiñ, da kaba leh katkum ki jingtip ba kyrpang jong ki nongsynshar, ki shipai BSF ki la ïoh kurup ïa kawei ka Drone 01 DJI Mavic 3 Classic na kawei ka lyngkha rep kaba don hajan ka shnong Barreke ha Ferozepur distrik.
Ha kawei pat ka jingjia kaba kum kane, da kaba bteng ïa ka jingpyrkhing khlem sangeh ïa ka jingkhaïi beaiñ sha shiliang pud, ki shipai BSF kiba peitngor bha, ha ka jingïatreilang, ki la kem ïa arngut ki nongkhaii beaiñ bad ki la ïoh kurup hynriew tylli ki Drone thok kiba kit ïa u drok heroin bad ki bynta jong ki tiar ïaleh ha ki jingjia kiba bun ha ki khappud Amritsar bad Tarn Taran.
Da kaba leh katkum ki jingtip ba la ïoh, la ïoh ban kem ïa arngut ki nongkhaïi tuh, kiba shong ba sah ha Bhikhiwind, hajan ka shnong Dal ha ka thaiñ Tarn Taran ryngkat bad kawei ka bike, ar tylli ki mobile bad ki bynta jong ka pistol ryngkat bad ki kuli bym pat pyndonkam, ong ka tyllong khubor.
Ha ki jingïatreilang ba bun jait ha kine ki khyndiat kynta ba ladep, ki shipai BSF ki la pynduh pyndam bad ïoh kurup haduh hynriew tylli ki Drone- san tylli ki DJI Mavic 3 Classic bad kawei ka DJI Air 3 S ha kylleng ki shnong Roranwala Khurd, Dhanoe Kalan, Bhaini Rajputana bad Daoke ha Amritsar. Kine ki drone ki kit ïa u drok heroin (ka jingkhia baroh: kumba 1.73 kg), ki bynta jong ki suloi bad ki Magazine bathylli.
