Ranchi, Nailar:
U Myntri Rangbah barim jong ka Jharkhand u Shibu Soren, bad u nongseng jong ka Jharkhand Mukti Morcha (JMM) u la khlad noh ha ka rta kaba 81 snem ha Delhi’s Sri Gangaram Hospital hadien ka jingpang kaba la slem bha kaba la bat ïa u.
U khun jong u bad u Myntri Rangbah ka jylla ba mynta, u Hemant Soren, u la pynbna ïa ka jingkhlad noh jong u kpa jong u da kaba ong, “U Guru Dishom ba donburom, u la iehnoh ïa ngi baroh. Mynta ka sngi, nga la kylla thylli”. U Shibu Soren, u la shah sumar ha hospital ha ka taïew ba khatduh jong u bnai Jylliew, namar ka jingpang ba ïadei bad u khyllai.
La tip bha ïa u kum u ‘Guruji’, u Soren u la long u briew ba kongsan ha ka jingïakhih na ka bynta ka jylla Jharkhand kaba kyrpang, uba la aiti ïa la ka jingim ban ïada ïa ka hok jong ki riewlum bad ki jaitbynriew ba shah iehnoh beiñ.
Ka jingïaid lynti jong u ha ka kam saiñ pyrthei ka la ïadei bha bad ki jingangnud jong ki paid Adivasi, bad u la sah kum ka bor ba kongsan ha ka saiñ pyrthei jong ka jylla bad ka ri haduh ki phew snem.
