Lucknow, Nailar:
U Umar Ansari, uba dei u khun jong u Mukhtar Ansari, uba la khlad noh, uba la kylla long u riew saiñ pyrthei, u la shah kem ha ka sngi U Blei, halor ka jingkynnoh ba u la aiti ïa ki kot ki sla kiba thok ha ka ïingbishar, ha ka jingthmu ban ïoh biang ïa ki jingdon jingem jong u kpa jong u, kiba la shah kurup.
Katkum ka kyrwoh ba la pyllait da u Superinten-dent of Police ka Ghazipur la ong ba ïa kine ki jaka la kurup katkum ki kyndon jong ka Uttar Pradesh Gangsters Act.
La mudui da ka dorkhas ha ka ïingbishar ban pyllait noh ïa ki jingdon jingem kiba dei jong utei u runar uba la shah set phatok uba la khlad noh na ka jingpang klongsnam ha kawei ka hospital ha Banda ha Uttar Pradesh ha u bnai Lber mynta u snem.
La kynnoh ba u Umar Ansari u la thmu ban ïoh kamai be-aiñ bad u la ai ïa ki kot ki sla kiba la ïathuh ba ki don ïa ki soi thok jong ka kmie jong u, ka Afshan Ansari, ha ka ïing bishar, ong ka kyrwoh. Ka Afshan Ansari mynta kadang phet rieh bad ka la kit ïa ka khusnam kaba T.50,000 halor ka khlieh jong ka.
“Mar ïa tip ïa katei ka kam thok, la mudui mukotduma pyrshah ïa u Umar Ansari ha Mohammadabad police station, ha kaba la mudui ha ki kyndon bapher bapher jong ka Bharatiya Nyaya Sanhita (BNS),” la pule ha ka kyrwoh.
U Umar Ansari u la shah kem, bad ka jingtohkit kaba kham bniah ka dang ïaid shakhmat, la bynrap shuh shuh ka kyrwoh.Katkum ka khubor na ki pulit, ka kynhun ki pulit ka Ghazipur, ki la kem ïa u Umar Ansari na Lucknow.
