New Delhi, Nailar:
Na ka jingpynlong ïa ka jingwad bniah kaba khlem sangeh, la ong ba ka jinglap ïa ki ID Card jong ki nongthep vote na Pakistan, ki Chocolate ba la shna ha Karachi, bad ka micro-SD chip kaba don ïa ki Biometric Records ka la pynshisha ba ki lai ngut ki lehnoh Lashkar kiba la shah pynïap ha ka 28 tarik, Naitung ha ka Operation Mahadev ki dei na Pakistan.
Shuh shuh, ka jingpeit bniah ïa ki thliew kuli ba la lap ha ka jaka thombor ha Pahalgam ruh ka ïahap bad ki dak Striation ha ki suloi AK-103 ba la kurup na ki lehnoh, kaba khlem artatien ba ki lai ngut ki don shadien jong ka jingpynïap briew ha ka 22 tarik, Ïaïong kaba la pynlong ïa 26 ngut ki riew paidbah ba kin shah pynïap.
Ïa kane ka jinglap la shim na ki sakhi sabut hadien ka jingïakynduh ba la pynmih da ki bor pahara dang shen. Haduh lai bnai hadien ka jingshah thombor ha Pahalgam, ki bor pahara ki la pynduh jait ïa ki lai ngut ki lehnoh ha ka 28 tarik u Naitung ha ka thaiñ Dachigam ha Srinagar ha ka Operation Mahadev.
Ka kaiphod ba la pyllait da ki tnad pahara ka la kdew ba u Suleman Shah u dei u nongmihkhmat jong ka jinghiar thma ha Pahalgam bad u nongsiat ba lamkhmat.
U Abu Hamza “Afghani” u dei u nongsiat uba ar katba u Yasir uba la khot sin u Jibran u dei u nongsiat uba lai.
Ar tylli ki Voter ID ba la Laminate ba la pynmih da ka Election Commission jong ka Pakistan la ïoh ban kurup na ki met jong u Suleman Shah bad u Abu Hamza. La lap ïa ki Voter Serial Numbers ha ka Electoral Rolls ha Lahore (NA-125) bad Gujranwala (NA-79).
Ha kawei pat ka jingshem ha ka liang ka teknoloji, ka micro-SD card kaba la ïoh kurup na ka Satellite phone kaba la shah pynjulor, ka don ïa ki biometric records jong ka NADRA (national citizen registry) jong baroh lai ngut, kaba pynshisha ba ki dei ki nong Pakistan.
Ki jingtip ba la ïoh ki kynthup ïa ki dak kti, ki dur khmat, bad ki jingthoh shaphang ka longïing longsem. Ki jaka sah jong ki kiba la pynrung kyrteng ki long ha Changa Manga (Kasur District) bad ka shnong Koiyan kaba don hajan ka Rawalakot, kaba don ha Pakistan-occupied Kashmir (POK).
Shuh shuh, la lap ïa ki sop jong ki Chocolate ‘Candyland’ bad ‘Chocomax’ (baroh ar tylli ki jait chocolate ba la pynmih ha Karachi) na ka song jong ki lehnoh ba la shah pynïap, kaba la pynskhem shuh shuh ïa ka jingïadei jong ki bad ka Pakistan.
Ka jingpeit bniah jong ki nongïalam bad ki tiar siat ka la pynthikna shuh shuh ba kitei ki lai ngut ki dei ki lehnoh kiba la donkti ha ka jingthombor kaba la jia ha ka 22 tarik, Ïaïong, ha kaba ki la pynïap ïa ki nongjngohkai pyrthei kiba lui-lui kiba thmu ban leit sha katei ka jaka na ka bynta ban ïaid kai bad ïoh mad ïa ka jingitynnad jong ka kshaid ha ka them Baisaran.
Ka jingpeit bniah ïa ki kuli ba heh 7.62×39 mm ba la lap ha ka jaka thombor jong ka Baisaran ka pynïadei bad ki dak Striation ha ki lai tylli ki suloi AK-103 ba la kurup na ki lehnoh.
Nalor kata, ki Mitochondrial Profiles ba la sei na ka snam ba la lap ha kawei ka sopti ba la tyrkhong ha Pahalgam ki long kiba ïasyriem bad ka DNA jong ki lai tylli ki met ba la lap ha Dachigam.
