Guwahati, Nailar:
Uwei u briew uba la leh mynleh kum u doktor bad uba la sumar ha ka hospital Silchar, u la puid ïa kawei ka briew kaba armet hashwa ba un shah kem ha ki nongshong shnong naba u la leh ïa ka kam thok kam shukor.
Kane ka jingjia ka long kaba sngewshyrkhei naba ka la don ka jingbym shimkhia jong ki doktor ban ban pynïaid ïa ki kam ai jingsumar kumba ka dei ban long.
Na ka jingbym shim khia jong ki doktor kiba dei ban ai jingsumar, uwei u briew uba la leh mynleh kumba u dei u doktor u la puid briew ha kaba la lap noh ïa u ha ka por ba u dang thmu ban leh ïa kane ka kam ha kane ka hospital kaba la rim bad kaba paw bha ha Silchar ka Shibsundari Nari Shiksha Seva Ashram Hospital.
Ïa une u briew uba la shah kem la tip kyrteng kum u Pulak Malakar, la lap ïa u hapdeng ka por ba u dang puid ïa ka longkmie, ha kaba ki pulit ki la tehlakam bad khanglad ïa u ba un bteng ïa kane ka kam ha ka por ba biang.
Kane ka jingjia ka la pynmih ïa ka jingbitar jong ki paidbah kaba jur bha, kaba la pynkhihwin thlim ïa ka thaiñ ha kaba ïadei bad ki rukom ai jingsumar jong kane ka hospital.
Ki khubor ba nyngkong ki pyni ba u Malakar u la pynlong kum u doktor uba tbit bad u la pynlong ïa ki jingsumar kiba bun jait-kynthup ïa ki jingsumar khlem da don kano kano ka kyrdan pule ba la ithuh, ka jingpynshisha, ne ka license.
Ki kam jong u ki la ïaid khlem da lapdien ei ei wat lada ka la ïaid slem, kaba la pynmih ïa ki jingkylli kiba khia shaphang ki kyndon jong ki hospital bad ki rukom peit bniah.
Katba ka khubor jong kane ka jingjia ka nang saphriang, ka jingtieng bad jingbitar ka la nangjur ha kylleng ki bynta jong ka Silchar.
Ki nongshong shnong ki la ïalum khrui shabar ka hospital, da kaba dawa ban leh da kaba tyngeh ïa kiba donkti. “Kane kam dei tang ka jingleh bymman-ka dei ka kam runar pyrshah ïa ka jinglong briew,” ong uwei na ki nongïakhih.
“Ngi shaniah ïa ka jingim jong ngi ha ki hospital. Kumno ki lah ban ailad ïa kum kane ka jingleh thok?”
Katkum ka khubor na ki pulit, ka jingtohkit kaba pura ïa katei ka kam runar ka dang ïaid mynta.
Ki bor pynïaid ki dang tohkit ïa ki nongtrei jong ka hospital, ki nongpynïaid, bad kiwei kiwei ki briew ban tip kumno u Malakar u la ïoh rung sha ki jaka sumar jong ka hospital bad treikam khlem da peit bniah.
Ki heh sorkar ki dang wad bniah ruh ïa ka jinglah ban don ka jingïateh lok kaba hapoh ne ki jingbakla ha ka jingpeit bniah jong ki tnat treikam.
