New Delhi, Nailar:
Ka Supreme Court kan shong bishar ha ka 8 tarik, Nailar, na ka bynta ka jingphah pynphai biang ïa ka jylla sha ka Jammu & Kashmir, hadien ka jingshah sloit noh ka jinglong kyrpang jong ka ha u snem 2019.
Ka ïingbishar bahakhliehduh kan sa bishar bniah ha ka sngi Thohdieng, halor ka jingkyrpad ban hukum ïa ka sorkar pdeng ban pynphai biang ïa ka jinglong jylla jong ka Union territory jong ka Jammu & Kashmir, la ong ka tyllong khubor.
U heh muktiar u Gopal Sankaranarayanan u la kdew ïa kane ka kam hakhmat u Chief Justice ka India u BR Gavai bad u la ong ba la pyni kumba la buh kyrteng ha ka 8 tarik u Nailar.
U Gopal Sankaranarayanan u la kyrpad ba ym dei ban weng noh ïa katei ka kam na ka thup kyrteng na ka bynta katei ka sngi. U Justice Gavai u la pdiang ïa katei ka jingkyrpad, la bynrap shuh shuh ka kaiphod.
Kumjuh ruh, ha ka 5 tarik u Nailar, 2019, ka sorkar pdeng ka la weng noh ïa ka kyrdan ba kyrpang jong ka Jammu & Kashmir bad ka la pynïakhlad ia ka jylla sha ki ar tylli ki Union Territories.
Katkum ka kaiphod, katei ka jingkyrpad ka long kum ka jingkyrpad ba bun ha kaba ïadei bad ka jingpynbeit ïa ka mat “Ha kaba ïadei bad ka Article 370 jong ka Riti Synshar” ha kaba ka Supreme Court ka la pynskhem ïa ka jingpyndam noh ïa ka kyrdan kyrpang jong ka Jammu & Kashmir.
Hynrei, ha kata ka rai kaba kongsan bha kaba la pynmih ha u bnai Nohprah, 2023, ka kynhun jong ka Riti Synshar ka la kiar na kaba rai halor ka jinglong riti synshar jong ka aiñ pynbeit thymmai ïa ka Jammu & Kashmir, 2019, kaba la phiah ïa ka jylla sha ki ar tylli ki jylla, ha ka jingshai jong ka jingpynthikna jong u nongïasaid aiñ ba ka jinglong jylla kan sa urlong biang” shen.
Ka ïingbishar ka la buh jingkynmaw hadien kata: “Ka jingpynphai biang ïa ka jinglong jylla kan jia kloi tam bad kloi katba lah,” hynrei kam shym la buh ïa ka por.
Ïa kane ka jingkyrpad kaba khatduh la wanrah da u Zahoor Ahmed Bhat uba dei u nonghikai kolej bad u Khurshaid Ahmad Malik uba dei u nongïakhih ha ka imlang sahlang. La mihkhmat da u Advocate-on-Record u Ejaz Maqbool, ki nongmudui ki kynthoh ba ka Centre kam shym la lah ban shim ïa kino kino ki sienjam ban pynïoh biang ïa ka jinglong jylla ha ki shiphew bnai naduh ba la pynmih ïa ka rai, wat hapdeng ka jingïaid beit ïaid ryntih jong ka ilekshon Assembly ha kane ka thaiñ.
Ka Congress kan rakhe ïa ka 5 tarik u Nailar kum ka “black day” shi bynta ban pyrshah ïa ka jingpynhiar kyrdan ïa ka J&K na ka jylla sha ka Union territory hynriew snem mynshwa bad kan shong ha ka jingïakhih ban pynbor ban pynphai biang ïa ka jinglong jylla.
Ha kajuh ka por, ki jingïalang jong ki bor bahakhlieh duh ki la pynmih ïa ka jingïakynad ha ka lah sngi U Blei ba ka sorkar pdeng ka lah ban sdang ïa ka jingtreikam ban pynphai biang ïa ka jinglong jylla jong ka thaiñ.
Kaba pynkhlain shuh shuh ïa kane ka long ka jingïalang jong ki dkhot jong ka Parliament ka NDA kaba la khot ha ka step sngi Ba-ar bad ki jingïalang ba kyrpang jong ka sngi U Blei hapdeng ka President Droupadi Murmu bad u Myntri Rangbahduh ka ri u Narendra Modi bad u Myntri ka tnat ki kam pohïing ka sorkar pdeng u Amit Shah.
Ki heh sorkar bad ki nongbud jong ka seng Bharatiya Janata Party (BJP) kiba don ha ka liang synshar ki la shu sngap jar jar halor katei ka kynhun ki jingïalang, kynthup ïa kawei ka jingïalang kaba u Shah u la pynlong bad u nongai jingmut ha ka liang ki lad ai jingïada ri u Ajit Doval, u heh jong ka Intelligence Bureau u Tapan Kumar Deka bad u Home Secretary u Govind Mohan ha ka lah sngi U Blei.
