Kolkata, Nailar:
Ka Myntri Rangbah jong ka jylla West Bengal ka Mamata Banerjee ka la kynnoh ba ki nongshong shnong jong ka ri India kiba kren Bengali ki shah pyndik bad shah thombor kum ki “bar jylla” ha ki jylla ba la synshar da ka BJP.
Ka Myntri Rangbah ka la pynshisha da kaba ong ba ka don ka jingthmu ban pyndam noh ïa ki kyrteng jong ki nongthep vote ba shisha bad u la kyntu ïa ki briew ban ïada ïa ka jinglong kyrpang jong ki ha ka liang ka ktien bad ka Riti synshar.
Ha ka 16 tarik, Naitung, ka Banerjee, ka la lamkhmat ïa ka jingïaid paidbah, halor ka jing kynnoh, ba ki don ïa ki briew kiba kren da ka ktien Bengali, ha ki jylla ba synshar da ka BJP. Da ki hajar ngut ki paidbah, ki la ïashim bynta ha katei ka jingïaid paidbah, kaba la sdang na madan College hapdeng jong ka Kolkata bad kaba la pynkut ha Dorina Crossing ha Dharmatala. Katei ka jingïaid paidbah, ka la long halor ka jingjia kaba dang shen, kaba ïadei bad ka jingshah kem jong ki 444 ngut ki briew, kiba la suba ba ki dei ki nong Bangladesh, ha Jharsuguda jong ka Odisha, katba ka Mamata, ka kam ba katto katne ngut na ki, ki dei kiba na Bengal.
Ki jingpynkynriah shnong dang shen ha Delhi, bad ka jingpynbna ba la ai sha uwei u nongrep ha Cooch Behar da ka ïingbishar jong ki nongwei ha Assam ruh ka la pynmih ïa ka jingpyrshah ha kaba ka la don ka jingïaid paidbah ban ïakhih.
Kham hadien, ka Banerjee, ka la kynthoh paidbah ïa ka sorkar Assam, kaba la ïalam da ka Bharatiya Janata Party, halor ka jingkynnoh ba ka la pyrshang ban pynkhih ïa ka National Register of Citizens (NRC) ha Bengal, ha kaba kam don hok ne don bor satia.
Haba kdew ïa ka jingpynbna NRC ba la pynmih da ka Assam Foreigner’s Tribunal sha uwei u nongshong shnong jong ka Cooch Behar u Uttam Kumar Brajabasi, ka Banerjee ka la ong, “Kane kam duna ïa ka jingthombor ïa ka synshar paidbah.
Shwa kane, ha ka 5 tarik u Jymmang, ka la pynpaw ruh ïa ka jingsngewkhia kaba jur halor kaei kaba ka la batai kum ka “jinglong kaba pynkulmar” jong ka jingshah thombor beiñ kaba thmu ïa ki briew kiba kren Bengali ha ka jylla ba marjan ka Odisha.
Ka Banerjee, ha ka sngi Palei ka la kynthoh jur ïa ka sorkar pdeng, kaba la ïalam da ka BJP, da kaba kynnoh ba ki thmu pyrshah ïa ki nongshong shnong jong ka India, kiba kren da ka ktien Bengali.
