Mumbai, Nailar:
U Myntri Rangbah jong ka jylla Maharashtra u Devendra Fadnavis u la ther tyngeh ïa ka jingkynnoh jong u MP ka Congress u Rahul Gandhi ba ka jingthep vote sha ka Ïingdorbar Thawaiñ jong ka Maharashtra ha u snem 2024 ka dei kaba la shu “tuh.” U Fadnavis u la rkhie beiñ ïa u Gandhi, da kaba ong ba u dei ban “peit ïa ka jabieng jong u” hadien ba u nongïalam ka Congress u la kynnoh ïa ka Election Commission ba ki ïatreilang bad ka seng BJP ban leh thok halor ka thup kyrteng jong ki nongthep vote.
Tang katto katne kynta hadien ba u Rahul u la pynlong ïa ka jingïalang bad ki nongthoh khubor, ha kaba u la pynpaw ïa ka jingleh thok jong ka Election Commission ïa ka thup nongthep kyrteng jong ki nongthep vote, u Fadnavis, u la kyntait jur ïa katei ka jingkynnoh jong u MP ka Congress. U nongïalam ka Congress, haba pynleit jingmut bha halor ka jingjied nongmihkhmat jong ka Maharashtra Assembly Poll 2024, u la ong ba ki jingjied nongmihkhmat jong u snem 2024 ha ka jylla ba shaphang Sepngi, kiba la jop da ka bor ba rai da ka kynhun synrop Mahayuti ba la ïalam da ka BJP, ki dei kiba la shu “tuh”.
U Rahul ha ka jingïakren bad ki nongthoh khubor ha ka jaka treikam ka AICC ha New Delhi, u la ong ba “ka jingmih na Maharashtra, ka pynshisha ïa ka jingsuba jong ka seng jong u, ba ka ilekshon sha ka ïing dorbar thawaiñ, ka dei kaba la shu’tuh’,” kumba la kdew da ka lad pathai khubor.
Kumba ka paw, la ong ba ka jingkren jong u Rahul Gandhi halor ka jingthep vote sha ka Ïingdorbar Thawaiñ jong ka Maharashtra ka la pynmeh ding beit ha ka kynhun BJP ha Maharashtra. Haba kren sha ki nongthoh khubor hajan Panaji, u Fadnavis u la kren beiñ ïa u Gandhi halor ka jingkynnoh thok jong u ïa ki nongthep vote ha Maharashtra, ha kaba la pynlong ïa ka jingthep vote sha ka ïing dorbar thawaiñ ha u bnai Naiwieng, 2024.
U Fadnavis, ula ong “Nga sngew ba, lehse, u (Gandhi) u dei ban phah peit bniah ïa ka (jabieng),” ong ka lad pathai khubor. U la ong ruh, “La ka jabieng jong u ka la shah tuh lane ka chip ha ka jabieng jong u ka la jah. Dei na kata ka daw ba u ju pynmih borabor ïa kum kine ki jingkren.”
