New Delhi, Nailar:
Shisngi hadien ba u President ka US u Donald Trump u la pynjur ïa ka jingïakajia halor ka khajna bad ka India, u Myntri Rangbahduh ka ri u Narendra Modi u la ai ïa ka jubab kaba tyngeh, da kaba ong ba ka India kan ym pyndem satia na ka bynta ban pynïoh jingmyntoi ïa ki nongrep bad ki nongtong dohkha jong ka.
Haba kren halor katei ka mat, u Modi u la kam ba ka jingïeng na ka bynta ki nongshong shnong ka lah ban wan ha ka jinglut, hynrei u la pynbna ba u long uba la pynkhreh ban ‘siew ïa ka dor’ khnang ban ïada ïa ka jingim jong ki.
Ka jingkren jong u ka wan kum ka khubor kaba khlaiñ jong ka jingpyrshah bad jingkyrshan ïa ki kam rep bad ki kam tong dohkha jong ka India ha ka por ba ki jingeh ha ka khaïi pateng hapdeng kine ki ar tylli ki ri ki nang kiew.
Haba kren ha ka MS Swaminathan Centenary International Conference ha Delhi, u Modi u la ong, “Na ka bynta jong ngi, ka jingmyntoi jong ki nongrep jong ngi ka dei kaba hakhmat eh. Ka India kan ym pyndem satia na ka bynta ka jingmyntoi jong ki nongrep, ki nongtong dohkha bad ki nongri jingei. Nga tip ba ngin hap ban siew ïa ka dor kaba heh na ka bynta kane, bad nga long uba la pynkhreh na ka bynta kane.
U la ong ba ki nongrep ki dang long ki mat ba kongsan tam jong ka India, da kaba pynpaw ba ka ri kan ym pynkheiñ satia ïa ki jingmyntoi jong ki — ka khubor kaba skhem kum ka jingkynthoh ïa ki jingsiew dor ba dang shen ba la pynjari da ka sorkar u Trump.
Kane ka jingkren jong u Modi ka long hadien ba ka sorkar u Trump ka la pynkiew ar shah ïa ka khajna jong ki mar India sha ka 50 percent.
Ha ka jingïakren halor ki kam khaïi pateng, ka US ka la pynbor ban kham ïoh lad ban ïoh ïa ka ïew rep jong ka India, khamtam eh ïa u riewhadem, Soybeans bad kynphad.
Hynrei ka India ka la pyrshah ban plie ïa ka kam rep bad ki jingri ba ai dud, namar ka jingsngewkhia ïa ka jingim hapoh ka ri bad ka jingktah kaba lah ban mih ïa ki nongrep.
Ha kajuh ka por, kham hashwa, ka India ha ka sngi Balang ka la batai iï ka jingleh jong ka US ban buh khajna 25 percent ïa ki mar India kum ka “bym hok, bym don nongrim bad bym don jingmut”.
Ka jingkynthoh kaba jur jong ka India ka la wan hadien ba u Trump, u la soi ïa ka hukum da kaba kdew ïa ka jingbteng jong ka India ban thied ïa ka umphniang bym pat pynkhuid jong ka Russia wat hapdeng ki jingpynjari jong ki ri Sepngi.
Kane ka jingbuh khajna kaba thymmai ka wan halor ki khajna kiba 25 percent kiba la dep ban pynjari da ka US, kaba wanrah ïa ka khajna kaba 50 percent ha ki mar India.
