Kolkata, Nailar:
Ka sorkar West Bengal, ka la pynpoi biang ïa palat 2,000 ngut ki nongbylla sngi, katba kiba bun ki dang sahkut ha ki jaka set ha ki jylla ba synshar da ka seng Bharatiya Janata Party (BJP) hadien ba ki la shah thombor kum ki nong Bangladesh, ong ka Myntri Rangbah ka jylla ka Mamata Banerjee ha kine ki khyndiat sngi jong ka taïew ba la lah.
Haba kren ha ka prokram synshar ha Bengal’s Jhargram district, ka Myntri Rangbah ka la kynthoh jur ïa ka Election Commission of India (ECI) namar ba ka la weng kam ïa saw ngut ki ophisar sorkar jylla.
“Ki briew na West Bengal ki shah pynshitom beiñ.Ngi la wanrah palat 2 hajar ngut ki briew. Ki briew (ki nongtrei bylla na West Bengal) ki shah set ha ki jaka ba la buh ban set shipor ïa ki ha Gurugram bad Assam. Ha Rajasthan ki kam thombor ki dang ïaid shakhmat. Kawei ka khynnah Dalit na Malda ka shah pynshitom beiñ ha Madhya Pradesh,” la ong ka Banerjee.
U National General Secretary jong ka Trinamool Congress (TMC) u Abhishek Banerjee ruh u la kynthoh ruh ïa ka kynhun ba dei khmih ha ki kam ilekshon, da kaba ong ba ka ECI ka leh palat ïa ka bor jong ka. “Ka sorkar pdeng ka la leh don bynta lang bad ka ECI ha ka jingleh jingkam kaba khlem don jinglehraiñ khnang ba kito ki nongthep vote kiba don hok kin ym ïoh ban thep vote. Ka ECI ka shimti ïa ka jingsynshar jong ka sorkar jylla hadien ba la pynbna ïa ki tarik ilekshon bad la pyntreikam ïa ka Model Code of Conduct. Kane kam dei ka por jong ka bor synshar jong ka ECI. Ka don ka sorkar ba la jied,” u la ong.
