New Delhi, Nailar:
U nongïalam jong ka seng Congress u Rahul Gandhi, hynnin ka sngi, u la ong ba ka liang pyrshah ka la ïakhun na ka bynta ban ïada ïa ka Riti synshar. “Ngi kwah ïa ka thup nongthep vote kaba khuid,” la pynskhem u nongialam ka liang pyrshah ha Lok Sabha wat haba ki MP kiba don bynta ha ka jingïakhih ki la shah kem ha ki pulit jong ka Delhi hapdeng ka jingkhihwin kaba jur.
Ki MP ka liang pyrshah, ki la mih ban ïashim bynta ha ka jingïaid naduh ka ïing dorbar jong ka Parliament shaduh ka jaka treikam jong ka Election Commission ban pynpaw ïa ka jingpyrshah ïa ka Special Intensive Revision (SIR) jong ka thup kyrteng jong ki nongthep vote ha Bihar. Da kaba phone da ki tupia kiba rong lieh ba la thoh ïa u dak pom ba rong saw ha ka kyntien ‘SIR’ bad “vote chori”, ki MP kiba ïakhih ki la pyrta bad ki la rah ïa ki placard bad ki banner kiba kynnoh “ka jingtuh vote” bad ka jingïasnohkti lang hapdeng ka EC bad ka sorkar. Kawei ka banner hakhmat ki MP kiba ïakhih ka thoh “SIR+Vote Theft =Murder of Democracy’, katba kawei pat ka la thoh “SIR – Loktantra Par Vaar”. Hashwa ban sdang ïa ka jingïaid paidbah ha Makar Dwar jong ka Parliament, ki la rwai ïa ka jingrwai ïeid ri.
Kine ki MP ki la rah ruh ïa ki placard “SIR par chuppi Kyu” ha ryngkat ki poster kiba kynnoh ba ka don ka jingïateh lok hapdeng ka EC bad ka sorkar. Hadien la rah noh ïa ki da ki pulit ha ki bos kiba la ïeng laiñ harud surok bad la rah noh ïa ki sha Parliament Street Police Station. Baroh ki MP ki la shah pyllait noh kham hadien.
Da ka jingbym kwah jong ka Election Commission ban ïakynduh ïa baroh ki MP ka liang pyrshah, ki pulit ka Delhi ki la buh ïa ki jingkhang ha ki katto katne ki jaka ban pynsangeh ïa ka jingïaid paidbah. Ki pulit ki la pynbna lyngba ki tynghung ba yn shah tang 30 ngut bad ki la kyrpad ïa ki MP ban phah ïa ki nongmihkhmat jong ki shakhmat. Khatduh ki MP, kynthup ïa u Rahul Gandhi, ki la shah pynsangeh ha ki pulit hapdeng lynti ha Transport Bhawan bad ki la kem ïa ki.
