New Delhi, Nailar:
Ka kynhun INDIA kumba la ïapynbeit, ka la rai ban buhlang ïa u kyrtong ban ïakhun na ka bynta ka ilekshon Vice-President bad u Presient jong ka seng Congress u Mallikarjun Kharge u dang leit sha ki seng ka liang pyrshah ban wad ïa ki kyrteng bad ban ïoh ïa ka jingïamynjurlang halor jong ka, la ïathuh ka tyllong khubor ha ka sngi U Blei.
Watla kam shym la don kano kano ka jingïakren kaba la buh ryntih halor ka jingjied ïa u kyrtong, hynrei ki jingïakren ba shadien ki dang ïaid hapdeng ki seng ba ïatreilang jong ka kynhun INDIA ban ïa pyrkhat ïa ki kyrteng jong ki kyrtong kiba lah ban long ha kaba u Kharge u leit sha ki seng pyrshah ban wanrah ïa ka jingïasngewthuh jingmut.
Ka don ka jingïasngewthuh jingmut hapdeng ki seng ba ka INDIA bloc kan buh ïa u kyrtong ba ïamonlang na ka bynta ka ilekshon jied Vice-President, la ong ki tyllong khubor ba la wan na ka seng Congress. Hynrei kawei ka kynhun jong ka kynhun pyrshah ka ngeit ba ka kynhun INDIA ka dei ban rai ïa u kyrtong jong ki hadien ba ka BJP ka la pynbna ïa ka jingjied jong ka.
Kane ka wan ha ka por ba ka jingïatylli ka la nang jur hapdeng ki nongthep vote jong ka INDIA block kiba la kular ban ïakhun pyrshah ïa ka jingpynkylla kyrpang ïa ki thup thep vote ha Bihar bad ka jingkynnoh thok ïa ki nongthep vote.
Ha ka jingpynpaw ïa ka jingïatylli, ki nongïalam bahakhlieh duh jong ka INDIA block ki la pynlong ïa ka jingïalang bam ja miet ha ïing sah jong u Rahul Gandhi uba long u nongïalam ka seng Congress ha ka sngi Palei bad ki la kular ban ïakhun pyrshah ïa ka jingpynkylla ïa ki thup kyrteng nongthep vote ha Bihar bad kumjuh ïa kaei kaba ki la batai kum ka “vote chori model” jong ka BJP-Election Commission.
