New Delhi, Nailar:
Ka Supreme Court ka la pynskhem ïa ka nongrim jong ka Election Commission of India (ECI) ba ïa u Aadhaar ym lah ban kheiñ kum ka jingpynshisha ba pura ïa ka jinglong nongshong shnong bad dei ban pynshisha da kaba laitluid. Kat kum ka khubor ba la ïohpdiang, la ong ba kane ka rai ka la mih ha ka por ba bishar ïa ki dorkhas kiba pynibor ïa ka Special Summary Revision ka Bihar (SSR) jong ka thup kyrteng jong ki nongthep vote, hapdeng ka jingsngewkhia halor ka jingshah kyntait paidbah.
Ka ïingbishar ba la ïalam da u Justice Surya Kant ka la ong, “Ka Election Commission (EC) ka long kaba dei ban pynskhem ba ym lah ban pdiang ïa u Aadhaar kum ka jingpynshisha ba pura ïa ka jinglong nongshong shnong. Ka jingpynshisha ka long kaba donkam bha.” U Justice Kant u la pynpaw ruh ba ka mat kaba kongsan eh ban pynbeit ka long hato ka ECI ka don ne em ïa ka bor ban pynlong ïa kum kane ka jingpynshisha. “Lada ka Commission ka duna ïa kane ka bor, ka jingtreikam kam lah ban ïaid shakhmat. Hynrei lada ka bor ka don, kam dei ban don ki jingeh,” u la bynrap.
U nongïasaid aiñ ba rangbah u Kapil Sibal, uba mihkhmat ïa ki nongujor, u la kynthoh ba ka jingpynshisha jong ka kynhun thep vote ka lah ban wanrah ïa ka jingshah kyntait jong ki nongthep vote kaba la saphriang bha, khamtam eh kaba ktah ïa ki briew shimet ki bym lah ban aiti ïa ki phorm kiba donkam. U la kdew ba ki nongthep vote kiba la thoh ha ka thup thep vote jong u snem 2003 ki dei ban pyndap ïa ki phorm kiba thymmai, bad lada kim kohnguh ka lah ban pynduh noh ïa ki kyrteng jong ki watla ym shym la pynkylla ïa ka jaka sah.
U Sibal u la kdew ba watla ka jingkheiñ jong ka Election Commission ka pyni ba 7.24 klur ngut ki briew ki la ai ïa ki phorm ba donkam, hynrei kumba 65 lak tylli ki kyrteng la weng noh khlem da wad bniah bha ïa ki jingïap ne jingwan buhai shnong. “Ki kam ha ka Affidavit jong ki ba ym shym la pynlong kano kano ka jingjurip,” u la ong.
Ka ïingbishar ka la buh jingkylli ïa ka nongrim jong ka jingkheiñ kaba 65 lak bad ka la wad ban tip hato kine ki jingsngewkhia ki dei kiba la pynshong nongrim ha ki jingshisha ba la pynshisha ne ki jingmutdur. “Ngi donkam ban sngewthuh lada ka jingtieng jong phi ka dei kaba shisha ne kaba shu mutdur,” la kynthoh ka kynhun nongbishar da kaba bynrap ba kito kiba la ai phorm la dep ban pynrung ha ka thup kyrteng ki nongthep vote.
U Sibal u la kynnoh shuh shuh ba ka thup nongthep vote jong u snem 2025 ka don 7.9 klur ngut ki nongthep vote, ha kaba 4.9 klur ngut ruh ki don ha ka thup jong u snem 2003, bad ba 22 lak ngut ki nongthep vote ki la shah buh dak kum kiba la khlad noh.
U Advocate Prashant Bhushan uba mihkhmat ruh ïa ki nongmudui u la kynnoh ba ka Election Commission kam shym la pynpaw ïa ka thup jong ki nongthep vote kiba la shah kyntait namar ka jingïap ne ka jingkylla jaka sah, la ha ki kot ki sla jong ka ïingbishar lane ha ka website jong ka. “Ki kam ba ki la ïasam katto katne ki jingtip bad ki agent kiba don ha ka kyrdan jong ka booth hynrei kim don kano kano ka jingkitkhlieh ban pynpaw sha kiwei pat,” la ong u Bhushan.
Ka ïingbishar ka la kdew ba lada u nongthep vote u ai ïa ka phorm kaba don ïa ki jingtip ba bniah shaphang u Aadhaar bad ka card rashon, ka EC ka don ka kamram ban pynshisha ïa kata ka jingtip. Ka la pan jingshai ruh hato la pynmih hok ne em ïa ki jingpynbna shaphang ki kot ki sla kiba la jah sha kito kiba ïadei kam.
