Bengaluru, Nailar:
U nongïalam ka liang pyrshah u R Ashoka ha ka sngi Ba-ar u la dawa ban hiar shuki noh ïa u Myntri Rangbah ka jylla u Siddaramaiah, u DCM u DK Shivakumar bad u Myntri ka tnat ki kam pohïing u Dr G Parameshwara da kaba khot ïa ki kum ki A1, A2 bad A3, da kaba ong ba ki dei ban shim ïa ka jingkitkhlieh halor ka jingïap jong ki 11 ngut ki briew ha ka jingjia jong ka jingïaïuh para briew ha ka por ba don ka jingïalehkmen jong ka jingrakhe ïa ka jingjop jong ka IPL ka RCB ha Chinnaswamy Stadium ha ka 4 tarik, Jylliew.
Haba kren halor katei ka mat kumba ar kynta shiteng ha ka ïing dorbar thawaiñ, u Ashoka u la ong ba u shim ïa ka sorkar marwei kaba kitkhlieh ïa katei ka jingjia ba sngewsih.
“Lada u Siddaramaiah u don kano kano ka jingsngewkhia, u dei ban pan map na ki paidbah ka jylla, baroh lai ngut ki dei ban shim ïa ka jingkitkhlieh halor kane bad ban hiar shuki noh, bad ka CBI ka dei ban tohkit bniah”, u la ong da kaba ai jingmut ba u Myntri ka Law u HK Patil un thaw ïa ki kyndon ban ïada ïa kum kine ki jingjia ba sngewsih hadien habud, bad ban thung ïa ka House committee.
“Dei ban ai ka hok ïa ki kmie ki kpa kiba la shah ktah jur ha ka jingjia basngewsih”, u la dawa.
U Ashoka u la kdew ba u Myntri Rangbah ha ka Account jong u ha ka rynsan ‘X’, u la buh ïa ka jingkhot sngewbha katba u Secretary ka DPAR u la ai jingmut ban pyrshah ïa ka jingïalum paidbah ha ki mawkyndon jong ka Vidhana Soudha.
Ka RCB bad ka KSCA, ha ka Affidavit jong ki, ki la ong ba ka sorkar ka la khot ïa ki, u la batai.
“Nga don ïa ka por jong ka jingjia bad ka kot jingthoh ba khlem wire… U khynnah rit u lah ban sngewthuh ba ka dei ka jingbakla jong ka sorkar bad mano ba donkti ha katei ka jingjia ba sngewsih”, u la kynnoh.
U la kynthoh jur ïa u Myntri Rangbah, u DCM bad HM namar ba ki la bteng ïa ka jingrakhe, khlem da pyrkhat ïa ki jingmynsaw, jingïap ha ka jingïaïuh para briew.
“U Shivakumar u dang ïoh jingtip man ka minit bad u lah ban pynsangeh noh ïa katei ka jingjia.
Lada kam dei ka prokram sorkar, balei u la ong ïa ki nongkyrshan ban wan sha madan?” u la buh jingkylli, u la ong ba ha ka jingïalang ha ka ïing sah jong u Myntri Rangbah ha Cauvery, ryngkat bad ki nongai jingmut u A.S.
“Ha kajuh ka por, u Myntri Rangbah u khot ïa u Lat lyngba ka phone na ka bynta ka prokram ha Vidhana Soudha. Hadien ka jingjia ba sngewsih, u la leh ïa ka Volteface bad ong ba um shym la khot ïa u Lat. Hadien, u la ong ba u la khot shisha ïa u Lat”, la pynrem u Ashoka.
“Lada ïa ki khyrdop jong ka Chinnaswamy Stadium — la kumno kumno kawei na ki shiphew tylli — la shu plie beit na ka bynta ki nongkyrshan, bad lada kan ym don ka jingbom lathi, kane ka jingjia kan ym wan jia, lah ban khanglad ïa ka jingjia ba sngewsih. Mano ba ai jingbit ban bom lathi,” u la pyrta, da kaba thmu ïa u Parameshwara.
U la kynnoh ba u Shivakumar u la pynleit jingmut ha ka ‘thma ai ram’ ban shim ïa ka burom na ka bynta katei ka jingrakhe.
Ka jinglong jong u Shivakumar ka long ka bym ïahap kum u DCM, namar u la ai burom khlem nongrim ïa ka RCB, u la leit wat sha kad liengsuiñ bad pdiang ïa ki nongïalehkai.
“Katkum ka jingong jong ka Justice D’Cunha Commission, la pyntreikam haduh 515 ngut ki briew. Hynrei tang 194 ngut ki la soi ïa ka thup jong ki nonglehkai Bandobast. Wat haba ki heh sorkar ki la wanrah ïa ki khubor jong ka jingïap briew sha ki Myntri, ka prokram kam shym la sangeh. Hato ka long kaba donkam ïa u DCM ban doh ïa ka Cup, ban bat ïa ka bad ban pyni ïa ka?” u la kylli.
