New Delhi, Nailar:
Ka jingïakhun pyrshah ïa ki lehnoh kaba la neh la kham slem, ka Operation Akal, ha ka thaiñ ba long khlaw jong ka Akal ha Kulgam distrik, la pynsangeh noh hadien 12 sngi. Ïa kane ka jingkhynra la sdang ha ka 1 tarik u Nailar hadien ba la ïoh ïa ki jingtip na ki nongsyntiat shaphang ka jingdon jong ka kynhun lehnoh ha katei ka thaiñ.
Ïa kane ka jingkhynra la sdang katkum ki jingtip ba lah ban ngeit kiba pyni ïa ka jingdon jong ki 5-6 ngut ki lehnoh kiba la taïar bha ïalade ha ka khlaw kaba rben jong ka Akal Khulsan.
Ka khlaw ka long ka jaka kaba rben bad kaba long krem bad kumjuh kaba sharing bha.
Kane ka jingkhynra ka dei shi bynta jong ka jingïakhun pyrshah ïa ki kynhun lehnoh hadien ka jingthombor jong ki lehnoh ha Pahalgam ha ka 22 tarik u Ïaïong, 2025.
Ka dei ka jingpyntreikam lang jong ki shipai ka tnat Indian Army (kynthup ïa ki kynhun Chinar Corps, ki Para Commando, bad ki Rashtriya Rifles), ki pulit jong ka Jammu & Kashmir (kynthup ïa ki kynhun Special Operation Group, SOG), bad ki pulit ka tnat Central Reserve Police Force (CRPF) kiba dang pynlong ïa ki jingleit thwet khnang ban ïoh pynïap ïa ki lehnoh, ban pynduh jait ïa ki kynhun lehnoh ka thaiñ bad ban pynduhjait ïa ki kynhun lehnoh ba ai jingkyrshan ha South Kashmir.
Ha ka 1 tarik u Nailar, ki kynhun pahara ki la sdang ïa ka jingker bad khynra hadien ba ki la ïoh ïa ki jingtip ba tikna. Kane ka jingkhynra, ka la wanrah ïa ka jingïasiat kaba markylliang, ha kaba ki lehnoh kiba la rieh lypa ha katei ka khlaw, ki la siat ïa ka kynhun jong ki shipai, ha kaba uwei na ki lehnoh ba ïatreilang bad ka kynhun Lashkar-e-Taiba, u Haris Nazir Dar, ula shah pynïap. La lap ïa ka met jong u ryngkat bad ka suloi AK-47 bad ki kuli.
Ka jingsiat ba markylliang kaba la jia ha ka por ba pynlong ïa ka jingleit thwet lehnoh ha ka 2 tarik, Nailar bad ka 3 tarik, Nailar.
Kumba la ïathuh ka tyllong khubor, la ong ba ki la don sa lai ngut ki lehnoh kibala shah pynïap, ha kaba kane ka la pynkiew ïa ka jingdon jong ki lehnoh ba la shah siat sha ki san ngut, watla ïa ka metïap jong uwei ym pat lap haduh mynta.
Ïa ki lehnoh kiba la shah pynïap, la tip ba ki dei ki dkhot jong ka kynhun TRF/Lashkar-e-Taiba, bad uwei u shipai, u la mynsaw ha kane ka jingïasiat ha ka por ba don ka jingleit thwet ïa ki lehnoh.
