Lucknow, Nailar:
Ka MLA jong ka Samajwadi Party (SP) ka Pooja Pal ka la shah beh noh na ka seng ha ka sngi Palei, khyndiat kynta hadien ba ka la ai khublei ïa u Myntri Rangbah ka Uttar Pradesh, u Yogi Adityanath uba la “pynïoh ïa ka hok” ha ka mukotduma pynïap ïa u kurim jong ka bad ka la ïaroh ruh ïa u namar ba u la wanrah ïa ki polisi kiba ïakhun pyrshah ïa ki nongleh kam sniew.
U heh ka seng SP u Akhilesh Yadav u la ong ba ka Pooja, kaba u kurim jong ka u Raju Pal u la shah siat ïap ha u runar uba la tip kyrteng kum u Atiq Ahmed ha u snem 2005, ka la shah beh noh mardor na ka seng namar ka jingdonkti jong ka ha ki kam pyrshah seng bad ka jingbym bud ryntih ïa ki kyndon ka seng kaba la bteng wat hapdeng ka jingïaleh pyrshah kaba pynsniewdur ïa ka seng.
Kane ka jingshah beh ka la pynmih ïa ka jingkulmar ha ka saiñ pyrthei ha kaba ka seng synshar Bharatiya Janata Party (BJP) ha kane ka jylla ka la kynnoh ba ki liang pyrshah ki dei kiba “pyrshah ïa ki Dalit”.
Ha ka jingkren jong u ha ka ktien Hindi, u Yadav u la ong: “Ka (Pooja) kam ïoh jingbit shuh ban ïashim bynta ha kino kino ki prokram jong ka seng bad kan ym shah khot sha ki ha ki por ban wan.”
Kane ka jingjia ka la jia hadien katto katne kynta ba ka Pooja ka la pynpaw jingsngewnguh bad ai khublei ïa u Myntri Rangbah ka jylla uba la “sngap ïa ka haba ym don mano mano ba sngap” halor ka jingshah pynïap jong u kurim jong ka.
U MLA barim ka Bahujan Samaj Party (BSP) u Raju Pal u la shah siat ïap ha ka 25 tarik, Kyllalyngkot, 2005, hadien katto katne sngi ba u la dep ïathoh bad ka Pooja. Katei ka jingshah pynïap, la ong ki pulit, ba ka dei na ka daw jong ka jingïabuh shun ha ki kam saiñ pyrthei bad u para jong u Atiq Ahmed, u Ashraf, ïa uba u Raju, u la pynliem ïa u, ha ka ilekshon shiteng samoi jong u snem 2004 sha ka shuki jong ka Prayagraj West. Ha u bnai Rymphang, 2023, u Umesh Pal, u nongsakhi ba kongsan ha katei ka kam pynïap briew, u la shah siat ïap ha ka thaiñ Sulem Saray jong ka Prayagraj.
