Shillong, Nailar 14
Ka Shillong Lajong FC ka la long ba la pynkhreh ban ïakhun pyrshah ïa ka Indian Navy F.T na ka bynta ban ïaknieh rung sha ka semi final ha ka lympung ïalehkai 134th Durand Cup 2025 ha ka sngi Saitjaiñ.
Kane ka jingïakhun quarter final kan long ha ka por 4 baje nohphai sngi ha Jawaharlal Nehru Stadium, Polo bad la khmih lynti ba kane ka jingïalehkai kan long kaba itynnad bad ka ban pynhun ïa ki paidbah nongpeitkai ki ban pyndap ïa katei ka stadium.
Kumba ka paw ka Lajong hapoh ka jingïalam u Birendra Thapa ka la wan ha ka ka kyrdan ba-ar ha ka Group-E ha kaba ka la kamai 6 point, katba ka Indian Navy FT hapoh ka jingialam u Raman Rai ka la wan ha ka kyrdan ba hakhieh jong ka Group-F da kaba kamai 7 point na ki lai sien ïakhun ha Imphal.
Kawei pat ka jingïakhun quarter final ka ban long ha kajuh hi ka sngi ha Kokrajar kan long hapdeng ka Bodoland pyrshah ïa ka NEUFC ha ka por 7 baje janmiet.
Kiwei pat ki jingïakhun quarter final kin long ha ka sngi U Blei hapdeng ka Jamshedpur pyrshah ïa ka Diamond Harbour ha ka por 4 baje nohphai sngi ha Jamshedpur bad ka Mohun Bagan ïa ka East Bengal ha ka por 7 baje janmiet ha Kolkata.
