Mumbai, Nailar:
U nongïalam jong ka seng Shiv Sena UBT u Sanjay Raut ha ka sngi Thohdieng, u la ong ba u heh ka seng jong u, u Uddhav Thackeray, bad u heh ka Maharashtra Navnirman Sena, u Raj Thackeray kin ïeng tylli lang na ka bynta ka ilekshon Municipal ban wan.
“U Uddhav Thackeray bad u Raj Thackeray kin ïakhun lang ïa ka ilekshon Municipal bad kin jop. Ka bor ba ïatreilang jong u Uddhav Thackeray bad u Raj Thackeray, ryngkat bad ka jingïatylli jong ki paid Marathi, ka dei u shabi jong ka jingjop ha ki ilekshon,” la ong u Sanjay Raut.
Ha u bnai Nairung, u heh ka Shiv Sena (UBT) u Uddhav Thackeray bad u heh ka MNS u Raj Thackeray ki la don bynta lang ha ka rynsan ha Worli Dome ha Mumbai katba ki dang pynlong ïa ka jingïalang paidbah hadien ba ka sorkar Maharashtra ka la weng noh ïa ki ar tylli ki Government Resolution (GR) ban pynrung ïa ka ktien Hindi kum ka ktien kaba lai.
Kine ki Thackeray kiba dei shipara, ki la pyndon burom ïa u mot jong u Chhatrapati Shivaji Maharaj, ha ka jingïalang jong ki seng jong ki, kata ka Shiv Sena (UBT) bad ka Maharashtra Navnirman Sena (MNS), ha Worli Dome ha Mumbai.
Haba ai jingkren ha ka jingïalang kaba la long ‘Awaz Marathicha’ ha Mumbai, u heh ka Shiv Sena (UBT) u Uddhav Thackeray u la ong ba u la wan ban “sah lang” bad u hynmen jong u u Raj Thackeray.
“Ngi la wan lang ban ïasah lang”, la ong u Uddhav Thackeray haba kren ha ka jingïalang. Ka ilekshon BMC la khmih lynti ba kan long ha u bnai Risaw mynta u snem.
