Srinagar, Nailar:
Ka surok bah Srinagar-Jammu ka la shahkhang ban ïaid kali hadien ba u slap uba jur u la wanrah ïa ki jingtwa khyndew bad ka jinghap jong ki maw ha ka thaiñ Ramban jong ka Jammu & Kashmir.
Kumba la sakhi, la ong ba ha kane ka por ki la don da ki spah tylli ki kali ki la sahkut ha surok bah.
Ka surok Kishtwar-Anantnag ruh ka la khang na ka daw jong u slap bad ka jingtwa khyndew.
Ki skul ha kylleng ki 10 tylli ki distrik jong ka jylla Jammu ruh ki la khang noh namar ba kane ka thaiñ ka ju mad ïa ka jingtwa khyndew bad ka jingshlei um ba khah khah.
Ka ophis treikam kaba dei khmih halor ki jinglong jingman jong ka mariang ka la antad ba kan don u slap ha kine ki 24 kynta ban wan hapdeng ka jingpyntreikam ban pyllait im ïa kiba shah khang lynti bad ban wad ïa ki met ïap jong kiba jah hadien ka jingwan hap jong u slap uba jur naduh ka sngi Palei ha Kishtwar.
Ki la don palat 60 ngut ki briew kiba la ïap, bad palat 80 ngut la don ka jingartatien ba kin im hadien ba ki la shah tep hapoh ki jingtwa jong ki lum lum bad ki mawsiang ha Kishtwar.
Da ki spah ngut ki nongpyllait im bad ki mashin ki la trei baroh shisngi ban wad ïa ki met ïap ha ka shnong ba kyndong jong ka Padder ha Kishtwar.
Ka jingjur slap ka la long ruh ha Kathua distrik ha ka sngi U Blei, ha kaba ki la don hynñiew ngut ki briew kiba la ïap, kynthup ïa san ngut ki khynnah.
Katto katne ki ïing sah ki la shah pynjulor, bad ki surok bad ki lynti rel ruh ki la shah ktah namar ka jingshlei um kaba la mih na ka jingther jong u slap.
