Jowai, Nailar 18
Ka Da-I-Hi Sports Club Mynsngat ka la long ka lahduh ha ka Independence Day Cup Under-17 Football Tournament 2025, hadien ba ka la lah ban pynliem noh ïa ka Lumpyrtuh Mihmyntdu da 2-0 kol ha ka 15 tarik mynta u bnai ha Kiang Nangbah Stadium, Jowai.
Ïa kane ka lympung la pynïaid da ka ophis u Deputy Commissioner, West Jaiñtia Hills District ryngkat ka ophis u District Sports Officer bad West Jaiñtia District Sports Association (WJDSA).
U MLA ka Jowai bad Chairman ka MUDA u Bah Wailadmiki Shylla ula long u kongsan, ha ka jingdonlang u District Sports Officer, West Jaiñtia Hills District u Bah Khroobok Passah, ki nongïalam bad dkhot nongkitkam ka WJDSA ba kynthup ïa u Vice President Bah Patrict Lamare bad General Secretary Bah Lammat O. Laloo nalor kiwei pat.
Ïa kitei ki ar kol ba la thep da ka Da-I-Hi Sports Club ka la wan urlong lyngba u Bantei Pyrtuh uba la thep ha ka minit kaba 20 bad kawei pat lyngba ka penalty ba la shut da u Ribait Bang haka minit kaba 25.
Ïa ka nam Man of the Match la ïoh da u Bantei Pyrtuh, ka Best Goalkeeper ka leit sha u Onipaia Pyrtuh, Top Scorer sha u Ribait Bang. Kine baroh ki dei na ka Da-I-Hi Sports Club Mynsngat, katba ka nam Player of the Tournament la ïoh da u Serene Dkhar jong ka Lumpyrtuh SYC Mihmyntdu.
Ha kajuh ka sngi, la pynkup burom ruh ïa ka kynhun ialehkai Under-17 jong ka North Liberty Higher Secondary School, Jowai kaba long ka lahduh ha ka State Level Subroto Mukherji Cup Football Tournament 2025 bad ka ban mihkhmat ïa ka Jylla sha ka Subroto Cup International Tournament ka ban long ha Delhi.
Nalor kata la pynkup burom ruh ïa ki nongïalehkai kiba khur takma ha ka State Level Inter School Athletic Meet 2025.
