New Delhi, Nailar:
U Myntri Rangbahduh ka ri, u Narendra Modi, u la kyrpad ïa ka liang pyrshah, ba kin kyrshan ïa u kyrtong jong ka kynhun NDA, na ka bynta ka shuki Vice President, u CP Radhakrishnan, khnang ba ïa u Chairman bathymmai jong ka Rajya Sabbha, yn jied lyngba ka General Committee. U Modi u la bynrap ruh ba u Rajnath Singh u dang ïakren bad ki nongïalam jong baroh ki seng ha kaba ïadei bad kane.
Hadien ba u la ïakynduh ïa u CP Radhakrishnan ha Delhi ha ka lah sngi U Blei, u Modi u la thoh ha ka rynsan X jong u, “Nga la ïakynduh ïa u Thiru CP Radhakrishnan Ji. Pynpaw ïa ka jingsngewnguh jong nga ïa u namar ka jinglong nongïakhun ïa ka shuki Vice President na ka kynhun NDA. Ka jingshakri kaba la neh slem jong u ïa ki paidbah bad ka jingtbit halor kiba bun ki kam kan sa ai mynsiem shisha ïa ka ri jong ngi. Ai ba un nang bteng ban shakri ïaka ri da kajuh ka rukom bad ban weng ïa ki jingeh baroh ba u shem.”
Ka NDA ba la ïalam da ka BJP ha ka sngi U Blei ka la pynbna ïa u Lat ka jylla Maharashtra u CP Radhakrishnan kum u kyrtong jong ka na ka bynta ka ilekshon Vice President ka ban sa long shen. Kane ka rai ka la mih hadien ka jingïalang jong ka Parliamentary Board ka BJP, ha kaba la ïashim bynta da ki heh nongïalam kynthup ïa u Myntri Rangbahduh ka ri u Modi bad u Myntri ka tnat ki kam poh ïing ka sorkar pdeng u Amit Shah.
