Patna, Nailar:
Shisngi hadien ba u Chief Election Commissioner u la kyrpad ïa u ban aiti ïa ka Affidavit halor ka jingkynnoh tuh vote jong u lane ban panmap hapoh shi taïew, u Rahul Gandhi, nongïalam ka seng Congress, ha ka lah sngi U Blei, u la ong ba ma u bad u nongïalam ka seng RJD, u Tejashwi Prasad Yadav bad ka Bihar kim tieng ïa kano kano ka jingpynma kaba kum kata.
Haba kren ha ka sngi kaba ar jong ka ‘Vote Adhikar Yatra’ jong u ha Aurangabad-Gaya, u Gandhi u la ong, “Ngam tieng ïa u Myntri Rangbahduh ka ri u Narendra Modi, ïa u Myntri ka tnat ki kam pohïing jong ka sorkar pdeng u Amit Shah lane ïa ka Election Commission. Ngan ïai pynpaw ïa ka jingshisha jong ka jingtuh ïa ki vote.” U la bynrap,
“Ngin pynthikna ba ka hok thep vote jong ki briew, khamtam ïa kiba duk, kan ym shah ktah. Kaei kaba nga leh, nga leh ïa ka da kano kano ka rukom.”
U Gandhi u la ïakynduh ïa ki nongthep vote ha kaba ïa ki kyrteng jong ki la shah pyndam noh ha ka por ba la pynlong ïa ka Special Intensive Revision (SIR) ban khmih bniah halor ki thup kyrteng jong ki nongthep vote.
U Sunil Oraon, uba dei u nongbylla ba khlem jaka ha Aurangabad, u ïathuh ba ki heh ophisar, ki la pan ïa ki kot ki sla jong ka jinglong trai jaka, kaba um don satia. “Ngam don jaka ha ka kyrteng jong nga.
Kumno ngan aiti ïa ki kot ki sla jong ka jaka? Ha kata ka khep, ngan duh noh ïa ka hok ban thep vote,” u la ong bad bynrap ba u la thep vote ha ka ilekshon Lok Sabha ha u snem 2024.”
Uwei pat u nongtrei ba ïoh tulop man ka sngi u la ong ba um lah ban ai ïa ki kot ki sla jong ka jaka namar ba u trei ha ka jaka jong kiwei.
U Tejashwi Yadav, uba don lang bad u Gandhi, ula kynnoh ba ka Election Commission, ka pan ïa ki kot ki sla, na ki briew kiba duk, kiba kim don satia.
Ka Ranju Devi na ka shnong Chasla ka la ong ba 6 ngut ki dkhot jong ka ïing jong ka ki la shah weng noh na ka thup thep vote watla ki la thep vote bunsien ha ki ilekshon ba la dep.
Hadien kata, u Gandhi, u la thoh ha ka WhatsApp Channel jong u, “Ka SIR, ka dei ka atiar kaba thymmai, na ka bynta ban tuh vote. Kine ki briew, ki la thep vote ha u snem 2024, hynrei, ha ka por jong ka jingthep vote ha Bihar, la pyndam noh ïa ka kyrteng bad ka jingithuh ïa ki, na ka synshar paidbah jong ka Ri India.”
Kane ka ‘Vote Adhikar Yatra’ kaba la sdang na Sasaram ha ka sngi U Blei kan kynthup ïa ki 25 tylli ki distrik bad kan kut ha ka 1tarik Nailur, ha Gandhi Maidan ha Patna.
