Ranchi, Nailar:
Ha ka jingpyni paidbah kaba ktah bha ha kaba ïadei bad ki jingeh ba la ïakynduh, ki nongshong shnong jong ka Pelol kaba don hapoh ka Murhu Block ha Khunti ki la rakhe ïa ka jingdap ar bnai jong ka jingtwa ka jingkieng ha ka surok Khunti-Torpa-Kolebira da kaba ot ïa u Cake halor ka jingkieng kaba la pra. Ïa kane ka rukom pyrshah kaba pher la jied namar ka jingtieng ïa ka jingktah kaba lah ban mih na ka sorkar jylla lada ki mih ban ïakhih sha lynti syngkien ne sha surok ha ka rukom ïakhih pyrshah kaba kham long tynrai.
Kumba la pynpaw la ong ba kane ka dei kajuh ka jingkieng Pelol kaba la pynbor ïa ki khynnah ka thaiñ ban mad ïa ki jingeh ha ka jingim jong ki kaba man ka sngi, da kaba kiew ïa ka pyrnon siej kaba jrong 25 phut ban poi sha ka skul jong ki. Hadien, haba ka dur jong ki khynnah kiba kiew ïa ka lynti ka la saphriang, ki bor synshar ki la leit sha katei ka jaka bad khang ïa ki ban leh kumta, da kaba pynthikna ïa ki ba ka jingpynbeit da kumwei pat halor kane kan sa long shen.
Kumba la sakhi, la ong ba hadien ka jingkular pyntreikam, wat hadien ar bnai ruh ym shym la shna wat tang ka lynti ïaid ba shipor. Katkum ka jingong ki nongshong shnong, da kaba ot cake ha katei ka jingkieng kaba la twa, ki thmu ban pynpaw ïa ka jingbym lah jong ka sorkar ban weng ïa ka jingeh ha ki jingshna bad ban pynbiang ïa ka lynti ïaid kali kaba shngaiñ bad kaba lah ban shaniah.
Kane ka rukom pyrshah ka pynpaw ïa ka jingduh jingkyrmen bad jingsngewsih jong ki paidbah ïa ka jinglong jingman. “Ym shym la shna ïa ka jingkieng ne lynti ba shipor ha kine ki ar bnai ba la dep bad kumta, ngim banse ban ot noh da u Cake kum ka jingpyrshah ïa ka jingbym shimkhia jong ka sorkar jylla ïa ki paidbah kiba sah ha kane ka jaka,” la ong uwei u nongshong shnong, u Jakarius Tiru. “Ngi ïakynduh jingeh shibun namar ba ym don surok ka ban shna ba ngin ïaid shipor, katba ym pat lah ban shna jingkieng. Ka la long kaba eh ïa ki khynnah ban ïaid lyngba ïa ka wah man ka sngi ban poi sha skul jong ki,” u la bynrap.
“Khamtam ki khynnah skul ki la shah ktah, ha kaba bun na ki ki pyndonkam da kaba jam lyngba ïa ka wah ban poi sha skul jong ki man ka sngi,” u la bynrap. U Tiru u la pyntip ba hadien ba ka jingkieng ka la twa, bun ki nongïalam kynthup ïa u MLA jong ka thaiñ ki la leit jngoh ïa katei ka jaka bad ki la buh ruh ïa u maw nongrim ban shna da kawei pat ka lynti, hynrei kane ka jingpynthikna ruh ka la paw ba ka long kaba jwat.
