New Delhi, Nailar:
Ka National Council of Educational Research and Training (NCERT) ka la pyllait ïa ki Module ba kyrpang halor ka Operation Sindoor, ha kaba yn hikai ïa ki khynnah skul naduh ka klas 3 haduh 12.
Katkum ka kaiphod ba la ïohlum da ki nongthoh khubor, la ong ba kane ka module ka ong ba ka Operation Sindoor kam dei “tang ka kam shipai hynrei ka dei ka jingkular ban ïada ïa ka jingsuk bad ban burom ïa ki jingim ba la duh.” Ka NCERT Module ka kren ruh shaphang ka jingshah kynnoh jong ka Pakistan ba ka la donkti ha ka kam thombor jong ki lehnoh kaba la jia ha Pahalgam.
“Ka Pakistan ka la kyntait ba ka donkti ha ka jing thombor ha Pahalgam hynrei la bthah beit beit da ki nongïalam ka tnat shipai bad saiñ pyrthei jong ka,” la pule ha ka Module jong ka NCERT.
Katkum ka kaiphod jong ka The Print, ïa kine ki ar tylli ki Module la ai kyrteng “Ka Operation Sindoor-Ka Saga of Valour” na ka bynta ki khynnah klas 3 haduh 8, bad “Ka Operation Sindoor-Ka Mishon jong ka burom bad ka jingshlur” na ka bynta ki khynnah klas 9 haduh 12.
Ha ka taïew ba la dep, sa kawei pat ka Module ba kyrpang jong ka NCERT na ka bynta ka ”Partition Horrors Remembrance Day”, kaba dei ka sngi kynmaw ïa ki jingma jong ka jingpynïakhlad”, kaba la ai kyrteng “Culprits of Partition,” kaba thew ïa ki nongleh kam sniew jong ka jingpynïakhlad.”
Ka jingkynthoh na katei ka Module ka la pynmih ïa ka jingïakajia hapdeng ka Congress bad ka BJP kaba la ong ba ka jingphiah ka dei na ka daw jong ki lai ngut ki briew – “U Jinnah, uba la dawa ïa ka; kaba ar, ka Congress, kaba la pdiang; bad kaba lai, u Mountbatten, uba la pyntreikam ïa ka”.
Ïa ka Module jong ka jingphiah bad ka Module jong ka Operation Sindoor yn ai shuh shuh ïa ki jingpynsngewthuh sha ki khynnah skul kum ki jingpule jong ki, kum shi bynta jong ka jinghikai bakongsan.
Ka Operation Sindoor ka dei ka jingpynkhreh jong ki shipai jong ka India halor ka jingshah thombor jong ki lehnoh ha Pahalgam. Ha ka 22 tarik, Ïaïong, ka kynhun ki lehnoh, ka la siat ïa ki nongjngohkai pyrthei ha ka them Baisaran jong ka Pahalgam, ha kaba ka la shim ïa ka jingim jong ki 25 ngut ki nong India bad uwei u nongjngohkai pyrthei, uba dei u Nepali.
Kum ka jubab halor kane ka jinghiar thma, ki shipai India ki la pynlong ïa ki jinghiar thma ïa ki jaka sah jong ki lehnoh ha kylleng ka Pakistan bad ha Pakistan-occupied Kashmir ha u bnai Jymmang.
Hadien kane, ka India bad ka Pakistan ki la shem ba ki la ïaleh pyrshah ha ka liang ka thma bad ki la don ha tduh jong ka thma kaba san bad ka ri ba marjan.Hadien saw sngi ka jingïaleh pyrshah, ka India bad ka Pakistan ki la poi sha ka jingïasngewthuh jingmut ban sangeh ïasiat.
