Bhubaneswar, Nailar:
Wat haba ka sorkar pdeng ka la buh por ha u bnai Lber, 2026 ban pynduhjait ïa ki kam pyntriem jong ki lehnoh ha ka ri, hynrei ka jingkynnoh ba ka don ka jingïadei hapdeng ki Maoist bad ki trai jong ki par marpoh khyndew /maw ha ka jylla ka la wan hapoh ka jingpeit bniah jong ki pulit ka Odisha hadien ba la ïoh ban kurup palat khyndai ton ki tiar pynbthei na ka distrik Kandhamal bad Ganjam.
Ka tyllong khubor ba la ïohlum na ki pulit ka ïathuh ba kumba 9.4 ton ki tiar pynbthei ba kynthup ïa ki Gelatin Stick bad ki Booster la ïoh ban kurup na Tumudibandha ha Kandhamal bad na Jagannathpur ha Ganjam ha ka 15 bad 16 tarik u Nailar bad la kem ïa uwei u trai par maw ryngkat bad arngut kiwei pat ki briew ha kaba ïadei bad kane.
La kurup ruh ym duna ïa ka 4,000 tylli ki tiar pynbthei na ki lai ngut kiba shah kynnoh. La ïathuh ba ïa ki tiar pynbthei kiba la ïoh kurup la shna da kawei ka kompeni ha Andhra Pradesh. Kham mynshwa ha ka 17 tarik u Naitung, ki pulit ki la ïoh ban kurup kumba 600 tylli ki tiar pynbthei jong kajuh ka kynhun na kawei ka jaka theh ñiut jong ki Maoist ha Kandhamal distrik ha ka por ba ki dang pynlong ïa ka jingkhynra.
Haba pyntip sha ki lad pathai khubor hangne ha ka lah sngi U Blei, u ADG Operations u Sanjeeb Panda u la ïathuh ba da kaba leh katkum ka jingïoh jingtip, ki pulit ka Tumudibandha ki la pynlong ïa ka jingkhynra katba dang pynkit ïa ki tiar pynbthei na Kandhamal sha Bhawanipatna ha ka miet 15 tarik u Nailar. U nongñiah kali uba kit ïa ki u la shah kem hadien ba um shym la pyni ïa kano kano ka kot kaba biang ha kaba ïadei bad ka jingkit ïa ki tiar pynbthei kiba bun bha.
Ha ka jingtohkit, utei u nongñiah kali u la pynpaw hakhmat ki pulit ba u la ïoh ïa ki tiar pynbthei na ka Godown jong uwei u briew ba la tip kyrteng kum u Hemanta Sethi (31) ha ka shnong Jagannathpur kaba hap hapoh u pud u sam jong ki pulit jong ka Chamakhandi ha Ganjam.
Ïa kine ki tiar pynbthei la pynkit sha ka jaka tih maw jong u Shakti Ranjan Dash (50 snem) jong ka Jaleswar Mandir Pada kaba hap hapoh u pud u sam jong ki pulit ka Bhawanipatna.
Hadien kata, ki pulit ki la leit ban khynra ïa ka Godown ha Jagannathpur, kaba dei ka jaka ri masi kaba khlem pat treikam, bad ki la ïoh ban kurup ïa ka jaka buh tiar pynbthei kaba heh bha.
La kem ïa u Hemanta hadien ba ki pulit ki la pynthikna ba um don kano kano ka licence bad u die beaiñ ïa ki tiar pynbthei, la ong u Panda.
U ADG Panda u la ong ba ka jingtohkit ka dang ïaid shakhmat ban lap lada don kino kino ki trai par jong ki marpoh khyndew/ki jaka tih maw kiba shah byrngem ha ki Maoist ban aiti noh ïa ki tiar pynbthei sha ki.
