New Delhi, Nailar:
Hadien ka jingshah thombor jong ka Myntri Rangbah ka Delhi, ka Rekha Gupta ha ka por ba don ka Jan Sunwai ha ka ophis treikam jong ka ha Civil Lines ha ka sngi Balang, ki Pulit ka Delhi ki la rai ban pynkylla bad kham pynbha shuh shuh ïa ka rukom ai jingïada ïa ka.
U briew ïa uba la leh ïa kane ka kam la tip kyrteng kum u Sakaria Rajeshbhai Khimjibhai, uba dei na Rajkot jong ka Gujarat, u la thombor ïa ka Myntri Rangbah ka jylla, ha ka por ba u ïakynduh ïa ka, ha ka dur jong u nongmudui. U la thap bad khynñiat ïa ka bad nangta u la pajut ïa u shñiuh jong ka shwa ba un shah pynibor ha ki nongap pahara jong ka.
Mynta ki pulit jong ka Central Reserve Police Force (CRPF) ki la shah pyntreikam ha ïing sah jong ka Myntri Rangbah ka Delhi.
Shwa ïa kane, ïa ka jingpahara ha ïing sah jong ka Myntri Rangbah la pynïaid da ki pulit ka nongbah Delhi. Hynrei katkum ki tyllong khubor, la ong ba mynta ki CRPF kin shimti iï ka jingkitkhlieh ban ïada ïa ka, da kaba bujli ïa ki pulit ka nongbah Delhi.
Ka jingpahara sawdong jong ka Myntri Rangbah ka jylla ruh mynta kan sa nang khlaiñ bha ha ki por ba pynlong ïa ki jingbishar paidbah. Mynta, yn ym shah ïa uno uno u briew shimet ban ïakynduh ïa ka Myntri Rangbah. Baroh ki jingujor ba la ai ha kum kine ki jingïalang yn hap ban pynshisha shwa hashwa ban shim, ong ki tyllong khubor.Ïa kane ka rai la shim da ka tnad kam pohïing ka ri hadien ba la thombor ïa ka Rekha Gupta ha ka sngi Balang.
Ha kajuh ka por, kum shi bynta jong ka jingtohkit, ki pulit ka Delhi ki lah ban rah ïa u Rajesh Khimji sha Rajkot ha ka por ba u don hapoh ka jingshah set patok kaba san sngi ban lum jingtip shuh shuh bad lehse ban thaw biang ïa ka jaka leh kam sniew ha ka ïing sah jong ka Myntri Rangbah.
La khmih lynti ruh ba ki nongtohkit kin wad bniah la une u nongshah kynnoh u la ïakynduh ne em ïano ïano ha Delhi shwa ban thombor bad mano ba u lah ban ïakren. Ïa ka mobile jong u la phah khmih bniah bha. Ki tyllong khubor ki ïathuh ba ki pulit ka Delhi kin sa tohkit ban lap ïa kano kano ka jingthmu kaba kham ma kaba don sha lyndet jong katei ka jingthombor.
Ki pulit ka nongbah Delhi ki la pynthikna ba u Rajesh Khimji u la shah pynngat ha ka kyndon aiñ 109(1) jong ka Bharatiya Nyaya Sanhita (BNS). Ki pulit ki la batai ïa u kum u “nongleh kam sniew ba man ka por” uba la don bun ki mukotduma kiba la dep ha Gujarat, kiba bun na ki ki la kut noh ha ka jingshah pyllait jong u.
