New Delhi, Nailar:
Ka ri India bad ka China da ka jingïasngewthuh jingmut ki la mynjur ban sdang biang ïa ka jingpynïasoh na ka bynta ka jingtreikam jong ki liengsuiñ hapdeng ka China bad ka India ka ban long kham kloi, ki heh sorkar ki la pyntikna ïa kane hadien ka jingwan jngoh jong u Myntri korbar ri ka China u Wang Yi sha New Delhi.
“Kine baroh arliang mamla ki la mynjur ban sdang biang ïa ka jingïadei ha ki kam liengsuiñ hapdeng ka ri China bad ka India ha ka por kaba kham kloi bad pynkut noh ïa ka jingïateh ba la pynthymmai jong ka Air Services Agreement. Ki la mynjur ruh ban pynsuk ïa ki visa sha ki nongjngohkai pyrthei, ki nongkhaïi, ki lad pathai khubor bad kiwei kiwei ki nongwan jngohkai ha baroh arliang mamla,” ong ka tnad kam bar ri ha ka kyrwoh khubor ba la phah.
Ïa ki liengsuiñ la pynsangeh noh hadien ka jingeh ba la mih ha Doklam bad la nang slem shuh shuh namar ka jingwan lynshop jong ka COVID-19.
Ki arliang mamla ki la mynjur ruh ban bteng bad pyniar ïa ka jingleit ïaid riewblei jong ki nong India sha Mount Kailash/Gang Renpoche bad sha Lake Manasarovar/Mapam Yun Tso ha Tibet ban sdang naduh u snem 2026.
“Kine ki arliang ki la mynjur ban plie biang ïa ka khaïi pateng ha khappud lyngba ki lai tylli ki jaka khaïi kiba la buh kyrpang, kata ka Lipulekh Pass, ka Shipki La Pass bad ka Nathu La Pass,” la bynrap shuh shuh ka kyrwoh.
Kine ki ar tylli ki ri ba marjan ki la mynjur ban buh ym duna ïa ka lai tylli ki lad treikam bathymmai halor ki mat ba ïadei bad u pud u sam.
Ka tnad kam bar ri ka la ong ba ki arliang mamla kin pyndonkam ïa ki lad jingïadei bad ki lad treikam jong ki shipai kiba la don lypa na ka bynta ka “jingpynïaid ïa ki khappud” bad ban sdang ïa ka jingïakren halor ka jingpynjem ïa ka jingïakynad.
Kane ka jingpynbna ka la mih ha ka por ba u Myntri Rangbahduh ka ri u Narendra Modi u la ïakynduh ïa u Myntri korbar ri jong ka China u Wang Yi ha ka ïing sah jong u ha New Delhi, hadien ka jingïakren jong ki bor ba hakhliehduh ha ka nongbah kham hashwa, katba ka New Delhi bad ka Beijing ki dang ïatreilang ban pynbeit bad pynkhlaiñ ïa ka jingïadei hapdeng ki ri ha ka dewbah Asia.
“Ka jingïadei kaba skhem, kaba lah ban tip lypa, kaba tei hapdeng ka India bad ka China kan ïarap shibun ïa ka jingsuk bad jingroi jingpar ha ka thaiñ bad kumjuh ha ka pyrthei,” la thoh u Modi ha ka rynsan X hadien ba u la ïakynduh ïa u Wang.
Kine ki jingkren bakhatduh, ki mih ha kaba kut jong ka jingleit jngoh jong u Myntri korbar ri jong ka China, u Wang Yi, kaba ar sngi sha New Delhi, na ka bynta ka jingïakren kaba 24 bad u Ajit Doval, u Advisor ka Indian National Security (NSA), na ka bynta ban pynbeit ïa ka jingïakajia pud jong ki, kaba la neh da ki phew snem.
Kham hashwa ha katei ka sngi, u Wang Yi, u la pynlong ïa ka jingïakren kaba ha khliehduh, bad u Ajit Doval, hadien ba u la ïakynduh ïa u Myntri korbar ri ka India u S Jaishankar, ha ka lah sngi U Blei.
U Doval u la pynbna paidbah ruh ba u Myntri Rangbahduh ka ri u Narendra Modi un leit sha China ban ïashim bynta ha ka jingïalang jong ka SCO ha Tianjin ha ka 31 tarik u Nailar bad ka 1 tarik u Nailur, da kaba kdew ba ki jingïakren jong ki nongmihkhmat ba kyrpang ki la shim ïa ka jingkordor kaba kyrpang bha ha kane ka jingleit.
