Hyderabad, Nailar:
Ka sorkar Telangana ka thmu ban pynpoi ïa ki jingshakri paidbah ba pyndonkam da ka AI sha shi klur ngut ki briew ha u snem 2027, la pynskhem u Myntri ka IT and Industries u D Sridhar Babu.
Haba kren ha Dr MCR HRD Institute hadien ba la plie ïa ka prokram ai jinghikai kaba lai sngi na ka bynta ki 250 ngut ki ophisar na ki 20 tylli ki tnad kaba la long ha ka taïew ba la lah, u Sridhar Babu u la pynkynmaw ba ka sorkar jylla ka thmu ban tei ïa ka AI economy kaba $5 billion, kaba la kyrshan da ki jingthmu kum ka AI City, ka AI University bad ka AI Innovation Hub.
Ïa kane ka prokram ai jinghikai la pynlong da ka Emerging Technologies Wing hapoh ka phang “AI-led Digital Transformation – Champions & Catalysts”.
Kan ai jinghikai bad jingai jingmut ba kyrpang ïa ki heh sorkar ha ki lai bnai ban wan, kaba pynlah ïa ki ban ithuh bad pyntreikam ïa ki lad ki lynti kiba pynshong nongrim ha ka AI ha ka jingsynshar.
La khmih lynti ba uwei pa uwei u ophisar un jied ïa kawei ka jingeh kaba kongsan ha ka tnad jong ki ban pynbeit lyngba ka AI, ryngkat bad ki jingtyrwa ba la jied ban rah shakhmat kum ki Pilot projek.
U Sridhar Babu u la ong ba ka jylla ka la dep ban plie paidbah ïa ka Telangana Data Exchange (TGDeX), kaba dei ka Data Exchange kaba nyngkong eh ha ka ri kaba la pynïaid da ka AI, kaba long kum ka nuksa na ka bynta kiwei pat ki jylla.
U Myntri u la ong ba palat 300 tylli ki jingshakri jong ki nongshong shnong yn pynbiang lyngba ki platform AI.
“Ka AI kam dei ban bujli ïa ki briew, ka dei ban pynlong ïa ka sorkar kaba kham shai, kaba kham stet bad kaba kham jan bad ki nongshong shnong,” u la bynrap.
Ha kane ka jingpynlait paidbah la don lang ki heh ophisar ba kynthup ïa u Chief Secretary u K Ramakrishna Rao bad u Special Chief Secretary u Sanjay Kumar.
