Bengaluru, Nailar:
Kawei na ki jylla kaba slem bha ban pyndep ïa ki jingshna ïing ha ki thaiñ nongkyndong hapoh ka jingtreikam ka skhim Pradhan Mantri Awas Yojana-Gramin (PMAY-G), ka Karnataka ka la paw ba ka long kaba sahdien shisha ha kane ka liang. Ïa kane la pynpaw da ki katto katne ki dkhot jong ka ïingdorbar ha ka dorbar Lyiur jong ka ïingdorbar kaba dang ïaid shakhmat.
Katkum ki jingkylli jong ki MP kiba bun, ka daw ba kongsan ba la kdew ka dei ka jingduna dor jong ka unit ba la mynjur na ka bynta ban shna ïing, kaba ki kynthoh ba kam pat biang ban pyndap ïa ka jinglut jingsep jong ki tiar bad ki nongtrei kiba mynta.
Katkum ki tyllong khubor, la kdew ruh ba ka jingbym don jaka kaba lah ban ïoh kum kawei na ki daw bah kaba la pynlong ïa ka jingbym lah ban treikam bha.
Katkum ka jingtip ba la sam da ka tnad pynroi ha ki thaiñ nongkyndong ha kaba jubab ïa ka jingkylli jong ka Lok Sabha, ka Karnataka ka la ïoh 9.44 lak tylli ki ïing hapoh ka PMAY-G naduh ba la sdang ïa ka ha u bnai, Ïaïong 2016. Hynrei haduh ka 13 tarik u Nailar, 2025, tang 5.25 lak tylli ki ïing la dep ban shna. Kane ka pyni ïa ka jingpyndep tang 30.28%, kaba duna bha ban ïa ka jingkheiñ kyllum jong ka ri baroh kawei kaba long 73.5%.
Kiwei pat ki jylla ba shathie ki la pyni ïa ka jingtreikam kaba kham bha. Ka Tamil Nadu ha kaba la ai jaka khlem jingsiew sha ki nongtrei bym don jaka ka la pyndep kumba 6.48 lak tylli ki ïing na ki 7.42 lak tylli kiba la mynjur, kaba la lah ban pyndep kumba 87.3%. Ka Andhra Pradesh, watla la mang kham duna ki ïing, hynrei ka don ïa ka jingpyndep kumba 36% ha kaba 89,061 tylli ki ïing la shna na ki 2.46 lak tylli kiba la ai jingbit. Ha kawei pat ka liang, ka Kerala ka la sahdien bha ha kaba tang 34,388 tylli ki ïing la pyndep na ki 76,278 tylli kiba la mynjur, kaba pyni ïa ka jingdon kaba haduh 45%.
Ki MP ki la pynpaw ïa ka jingsngewkhia ba ka jingkyrshan pisa jong ka skhim – mynta haduh T.1.2 lak shi unit ha ki jaka madan kam pynpaw ïa ka jinglut ba shisha jong ka jingtei ha ka ïoh ka kot mynta. Ki la kdew ba ka jingkiew dor jong ki tiar shna ïing, ka leit ka wan, bad kiwei kiwei ka la pynlong ïa ki nongïoh jingmyntoi na nongkyndong ban shna ïa ki ïing kiba lah ban shong ban sah hapoh ka jinglut kaba mynta.
Wat hapdeng kine ki jingsngewkhia, ka tnad pynroi nongkyndong ka la pynshai ha ka jubab ba thikna jong ka ba kam don kano kano ka jingtyrwa kaba dang bishar bniah ban pynkiew ïa ka dor unit jong ki ïing hapoh ka PMAY-G.
Ka sorkar ka pynskhem ba kane ka skhim ka treikam lyngba ka jingïatylli bad kiwei pat ki jingthmu ban ïarap ïa ki nongkyndong kum ka Mahatma Gandhi National Rural Employment Guarantee Scheme (MGNREGS), kaba ai shuh shuh ïa ki nongtrei bym don jingtbit, bad ka Swachh Bharat Mission-Gramin na ka bynta ban shna jaka leit bar.
