Chennai, Nailar:
U Collector jong ka distrik Kallakurichi u MS Prasanth, ha ka sngi U Blei, u la maham ïa ki paidbah ba yn sa leh katkum ki kyndon aiñ kiba tyngeh pyrshah ïa kino kino kiba donkti ban pynïathoh bad pynshongkurim khynnah ha ka distrik.
U la ban jur ba ka jingpynshong kurim ïa ki khynnah kynthei kiba hapoh 18 snem ka rta ka dei ka kam beaiñ kaba lah ban pynshitom, bad baroh ki liang kynthup ïa ki kmie ki kpa, ki bahaïing hasem, ki trai hall, bad ki nongïashim bynta kin ïakynduh jingeh na ka jingshah mudui mukotduma katkum ka aiñ ba la khang pyrshah hapoh ka kyndon Prohibition of Child Marriage Act bad POCSO Act.
Kane ka hukum ka la mih hadien ba la dep ban ujor palat 70 tylli ki ejahar ha Kallakurichi pyrshah ïa ki jingjia shongkha khynnah, ha u snem 2025, ong ki tyllong khubor. Haba pynpaw ïa ki jingma kiba khraw ha ka imlang-sahlang na ka jingshongkha khynnah bad ka jingpun khun ha ki khynnah ba dang poh rta, u Prasanth u la ong ba kine ki rukom leh ki khanglad shibun ïa ka jingkiew jong ka distrik. “Ki khynnah kynthei ki shah pynbor ban sangeh noh ïa ka jingpule hadien ba ki la shongkurim, kaba kylla long ka jingkhanglad kaba khraw ïa ka jingpynkupbor ïa ki kynthei,” u la kdew.
Ka jingkha khun kloi, u la maham, ka ktah ïa ka koit ka khiah jong ki kmie kiba dang poh rta bad ka wanrah ïa ka jingduna ka jingkhia i khun bad ka jingheh jingsan jong ki khyllung. U la ong shuh shuh ba ki kmie kiba dang poh ka rta, ki bym pat biang ka jingmut jingpyrkhat, bunsien ki shem jingeh ban pynsan pynrangbah ïa ki khun ha ka rukom kaba biang. Da kaba shaniah ha ka liang ka ïoh ka kot ha ki kurim jong ki, bun ki longkmie kiba dang khynnah ki ïakynduh shibun ki jingeh khamtam ha ka jingshah leh donbor hapoh ïing poh sem.
U la kyntu ïa ki paidbah ba kin ithuh ïa ka jingma kaba jur ha ka imlang-sahlang kaba mih na ka jingshongkha khynnah bad ban ai ka jingïatreilang kaba pura sha ka bor synshar distrik ban ïada na ka.
Ki nongshong shnong ki lah ban pyntip lada ki don jingsuba halor kum kine ki jingjia sha u Toll-free 1098 bad 181, u Collector u la ong, da kaba pynpaw biang ba ka bor synshar ka thmu ban pynduh jait ïa ka jingshongkha khynnah na ka distrik.
