New Delhi, Nailar:
Ki pulit ka nongbah Delhi, ki la kem biang sa ïa uwei pat u briew, ha kaba ïadei bad ka jingshah thombor ba dang shen, ïa ka Rekha Gupta, Myntri Rangbah ka Delhi.
Une uba shah kynnoh, u dei uba la tip kyrteng kum u Tahseen Syed, u la shah kem halor ka jingkynnoh ba u la donkti ha ka jingïasuhbuit sniew.
Katkum ka jingïathuh jong ki heh sorkar, la ong ba u Tahseen uba shong ba sah ha Rajkot u dei u paralok ba jan bha jong u Rajesh Bhai Khimji Bhai Sakariya uba shah kynnoh ba u longu nonglam khmat ha ka ban thombor ïa ka Myntri Rangbah. Ka jingtohkit ka la lap ba u Tahseen u la phah ïa ka pisa kaba T.2 hajar sha u Rajesh shwa katei ka jingjia.
Ki pulit ki la kem ïa u Tahseen ha Rajkot bad hadien kata ki la wanrah ïa u sha Delhi, ha kaba la kem thikna ïa u. Kane ka dei ka jingshah kem kaba arsien ha kane ka kam. Nalor u Tahseen, ki pulit ka Delhi ki la tohkit ruh ïa san ngut ki paralok jong u Rajesh kum shi bynta jong ka jingtohkit kaba dang ïaid shakhmat.
Kane ka jingshah thombor ka Myntri Rangbah ka Rekha Gupta ka la jia ha ka por ba don ka Jan Sunwai (jingïalang paidbah) jong ka kaba man ka taïew ha ka ïing sah jong ka ha Civil Lines ha ka step jong ka sngi Balang. Kine ki jingïalang paidbah, kiba la pynlong naduh ba ka la shimti ïa ka kam, ki ailad ïa ki nongshong shnong na kylleng ka Delhi ban wanrah beit ïa ki jingeh jong ki sha ka Myntri Rangbah.
U Sakariya, u la poi ha ka ophis jong ka Camp da ka Rikshaw bad u la ïoh ban rung da kaba leh kum u nongujor. U la aiti katto katne ki kot ki sla, da kaba kynnoh ba u pan jingpyllait ïa uwei u bahaïing hasem uba la shah set phatok. Hadien katto katne por, u la thombor ïa ka Myntri Rangbah, u la thombor ïa ka bad nangta u la khynñiat ïa ka bad pajut ïa u shñiuh jong ka.
