New Delhi, Nailar:
Ka kynhun Enforcement Directorate (ED) ha ka sngi Ba-ar ka la pynlong ïa ka jingkhynra ha ki jaka ba ïadei bad u nongïalam ka seng Aam Aadmi Party (AAP) bad u MLA u Saurabh Bharadwaj, bad kiwei kiwei ha kaba ïadei bad ka jingkynnoh donkti ha ka jingleh thok ïa ka jingshna hospital ha Delhi ha ka por ba u la long Myntri ka tnat ka koit ka khiah.
Ki la don palat shiphew tylli ki jaka ha ka nongbah jong ka ri ki dang shah khynra ha ka tnad tohkit jong ka sorkar pdeng katkum ki kyndon hapoh ka Prevention of Money Laundering Act (PMLA), la ong ki khubor.
U Bharadwaj, uba mihkhmat mynta ïa ka Greater Kailash konstitwensi, u la bat bun tylli ki kam bakongsan ha ka sorkar Delhi. U la long ruh kum u Chairman jong ka Delhi Jal Board bad mynta u dei u khlieh ïa ka kynhun ka seng AAP ha Delhi.
Katkum ka kyrwoh ba thikna ba la wan na ka tnad Anti-Corruption Branch (ACB), la ujor mukotduma pyrshah ïa u Bharadwaj bad u Myntri ka koit ka khiah barim ka Delhi u Satyendar Jain. Kane ka mukotduma ka dei shaphang ka jingkynnoh ba don ka jingbamsap kaba jur ha ki projek pynroi ïa ka koit ka khiah ba la mynjur da ka sorkar Delhi.
Ka ACB ka la pynpaw ba 24 tylli ki projek hospital, kiba kynthup ka jingkyntiew ïa 11 tylli ki jaka thung jingthung bad 13 tylli ki jaka khyndew ha u snem mang tyngka 2018-19 ha ka jinglut kaba la antad ban long T.5,590 klur.
Hynrei la ïathuh ba ki projek ki la mad ïa ka jingpynslem kaba jur bad ka jingkiew dor kaba jur bha, kaba la pynmih ïa ka jingsngewkhia kaba jur halor ka jingpyndonkam bakla ïa ka pisa bad ka jingbamsap.
