Lucknow, Nailar:
Ka la don ka jingpyntreikam pyrkhing pyrshah ïa ki san ngut ki ophisar ki bym shym leit ïashim bynta ha ka jingïalang bishar bniah ba la pynïaid da u Myntri Rangbah ka Uttar Pradesh, u Yogi Adityanath ha Gorakhpur, ong ka khubor jong ka ophis treikam jong u Myntri Rangbah.
U Divisional Commissioner u Anil Dhingra u la bthah ban pynsangeh noh ïa ka tulop shisngi jong ki bad u la ai jingmut ruh ban leh da ka tnad ban leh pyrshah ïa ki.
Kine ki ophisar ki bym shym la don ha ka jingïalang ïa kiba ka Divisional Commissioner ka la shim khia, ki kynthup ïa ki Project Manager jong ka C&DS Unit 14, 19 bad 42 (baroh lai tylli ki unit), u Executive Engineer ka Uttar Pradesh Rajya Nirman Sahakari Sangh (UPIRNSS)-I bad u Principal ka BRD Medical College.
Kham hashwa, u Myntri Rangbah u la ïakren bad ki briew ha ka por jong ka Janata Darshan kaba la long ha ka step jong ka Sngi U Blei hadien ba u la sah miet ha ka temple Gorakhnath.
U la sngap ïa ki jingujor jong ki bad u la bthah ïa ki heh sorkar ban pynbeit ïa ki da kaba kloi, kaba sngewrit bad kaba shai.
“Kam dei ban don ka jingpynslem ban pynbeit ïa ki jingeh paidbah. Man la ka jingpynbeit ka dei ban long kaba bha, kaba shai, bad kaba pynhun. Ka sorkar ka shimkhia ban pynbeit ïa man la ka jingeh jong ki paidbah,” la ban jur u Myntri Rangbah.
Ha ka jingïalang u Myntri Rangbah u la phai khmat ha kaba ïadei bad ka bha ka miat jong ki paidbah bad ban ïaleh katba lah ban weng ïa ki jingeh jong ki kiba ïakynduh na ka por sha ka por ha kiba bun rukom.
Ha ka Janata Darshan kaba la pynlong shabar jong ka Mahant Digvijaynath Smriti Bhawan ha ka step Sngi U Blei, u Adityanath u la leit sha ki paidbah kiba shong ha ki shuki, da kaba sngap ïa ki jingeh jong ki kawei hadien kawei.
Katkum ka jingpynbna paidbah, u la ïakynduh ïa jan 200 ngut ki briew bad pynthikna ba ïa ki jingeh jong ki yn sa pynbeit.
Hadien ba u la sngap ïa ki nongmudui, u la aiti ïa ki jingmudui jong ki sha ki heh ba dei peit, da kaba bthah ïa ki ban pynthikna ban pynduh noh kloi katba u pynthikna ïa ki nongshong shnong ba yn ym shah ïa kano kano ka jingbymhok.
U Myntri Rangbah u la bthah ruh ïa ki ophisar ba kin shim ïa ka rukom treikam kaba bniah ha kaba ïarap ïa kiba shah ktah.
U la kren shai ba kito kiba rung be-aiñ ha ka jaka ne kiba pyndonkam bakla ïa kiba tlot kim dei ban shah pyllait ha kano kano ka jinglong, bad dei ban shim ïa ki kyndon aiñ kiba tyngeh pyrshah ïa ki.
Katto katne ngut ki briew ki la wad jingïarap pisa na ka bynta ban sumar ïa ki jingpang kiba shyrkhei.
U Yogi u la pynthikna ïa ki ba ka sorkar kan ai ka jingkyrshan kaba pura na ka bynta ka jingsumar.
Haba aiti ïa ki aplikeshon jong ki sha ki heh sorkar, u la bthah ba dei ban pynkhreh ïa ki jingkheiñ jingdiah na ka bynta ka jingsumar khlem da pynslem bad ban phah sha ka sorkar kham kloi.
