Shimla, Nailar:
Ka jylla Himachal Pradesh ka la mad ïa ka jingduhnong kaba jur ha kaba ïadei bad ka jingduh noh jong ki mynsiem briew bad ki jingdon jingem ha kane ka aïom slap kaba dang ïai bteng. Kumba la buh jingkheiñ da ka Himachal Pradesh State Disaster Management Authority (SDMA), la ong ba ki la don 310 ngut ki briew kiba la ïap naduh ka 20 tarik, Jylliew.
Napdeng kine kiba la ïap, 158 ngut ki dei kiba la ïap ha ki jingjia kiba ïadei bad ka jingjur slap kum ka jingtwa khyndew, ka jingshlei um, ka jingngam jyllop, ka jingpom pyrthat, ka jingshah bat bording ilektrik bad kiwei kiwei ki daw kiba mih na ka jinglong ka suiñbneng, katba 152 ngut ki la ïap ha ki jingjia aksiden ha ki surok.
Ka jingkheiñ jong ka SDMA ka pyni ïa ka jingbun jong ki briew kiba ïap na ka jingther u slap ha kaba la lum jingkheiñ ba na Mandi ki la don 29 ngut kiba la ïap, Kangra (30 ngut), Chamba (14 ngut), Kinnaur (14 ngut), bad Kullu (13 ngut).
Tang ki jingtwa khyndew bad ki jingshlei um ki la pynïap ym duna ïa ka 19 ngut, ha kaba ka jingshah rong um ka la shim ïa ka jingim jong ki 33 ngut. Ka jingshah bat ha ka bording ilektrik bad kiwei kiwei ki jingjia ba sngewsih kiba ïadei bad u slap ruh ki la pynkiew ïa ka jingdon jong ki briew kiba ïap.
Ki jingjia aksiden ha ki surok, ki la jur bha hapdeng ki surok kiba syntuid, ka jingbym lah ban ïohi bha, bad ki jingtwa khyndew, kine ki jingjia ki la shim ïa ka jingim jong ki 22 ngut ki mynsiem briew ha Chamba bad Mandi, 19 ngut ha Kangra, 16 ngut ha Solan, bad 15 ngut ha Shimla.
La ïoh jingtip ruh ba ka jingïap jong ki briew ha kine ki jingjia, ka la long ruh ha Bilaspur (7 ngut), Kinnaur (14 ngut), Kullu (13 ngut), bad ha kiwei kiwei ruh ki distrik.
Kane ka jingshah pynjulor ka la wanrah ruh ïa ka jingjulor kaba khraw ïa ki jingtei bad ka rukom im ba man ka sngi.
Ka jingduhnong baroh kumba la antad ïa ki jingdon jingem jong ki paidbah ka long palat T.2.45 lak klur, ha kaba ka tnat Public Works Department (PWD) ka la ïathuh ba ka long T.1.31 lak klur ha ka jingjulor ha ki surok, ka Jal Shakti Vibhag (JSV) ka la kdew T.87,226 klur ha ka jingduhnong ki lad pynpoi um bad ka Power Sector da T. 13,946 klur ha ka jingjulor ki jingtrei ba ïadei bad ka jingsam bording.
Ka jingjulor jong ki jingdon jingem, ka long ba ki la don kumba 324 tylli ki ïing kiba la shah pynjulor lut, 396 tylli kiba malu mala bad ki la don ruh da ki hajar tylli ki dukan, ki sem masi bad kiwei pat ki jingshna. Ka tyllong khubor ka la ïathuh ba ka jingduh noh jong ki jingri ka la long da 1,846 tylli bad 25,755 tylli ki dei ki syiar.
Ki la don palat 670 tylli ki surok, kynthup ïa lai tylli ki surok bah jong ka ri, ki la shah khang lynti, 1,413 tylli ki Transformer sam bording kiba la shah pynjulor bad 420 tylli ki skhim sam um kim lah ban pyntreikam, kumba la pynshai da ka State Emergency Operation Centre (SEOC).
Ka jingpynïasoh kam pat lah ban treikam ha ki bynta jong ka thaiñ Chamba namar ka jingthut jong ka network bad ki surok. Katto katne ki jaka ba kongsan ha ki distrik Mandi, Kullu, Kangra bad Shimla ki la kylla long ki jaka ki bym lah ban ïaid namar ka jingjur jong ki jingtwa khyndew bad ki jingtwa. Tang ha Mandi, ki don 342 tylli ki surok kiba la shah khang, kynthup ïa ka National Highway 03, katba ka Kullu, la ïathuh ba ki don 131 tylli ki jingshah khang surok, ha kaba ka NH 305 ka la khang. Ha Kinnaur ka surok NH-05 ka dang sahkut ha Nigulsari Tranda.
Ki jingtei ba ïadei bad ki jingsam bording ki la shah ktah jur ha Kullu, Mandi, bad Kangra, ha kaba na ka jingkheiñlang baroh ki la don 1,400 tylli ki transformer kiba la shah pynjulor ha kylleng ka jylla. Ka jingpynbiang um ruh ka la thut, khamtam ha Kullu ki la don (88 tylli ki skhim), Mandi (62 tylli), bad Kangra (148 tylli), kaba la pynlong ïa ki hajar ngut ki nongshong shnong ban ym ïoh ïa ka um dih.
Ki bor pynïaid ki la ong ba ka jingtrei ban pynbha pat ka dang ïaid shakhmat, hynrei u slap uba bteng bad ka jingtwa khyndew kaba ju jia man ka por ka pynthut ïa ki jingpyntreikam. Ka SDMA ka la kyntu ïa ki paidbah ban kiar na ki jingleit jingwan ki bym donkam ha ki jaka ba shah ktah bad ban bud ïa ki jingbthah ba la pynmih da ki bor synshar shnong.
Ki heh sorkar ki la ong ba ïa ki kam pynbha la pyntreikam kham stet, hynrei u slap uba jur uba ju jia man ka por bad ka jingtwa khyndew kaba ju jia man ka por ki dang ïai bteng ban khanglad ïa ki jingtreikam.
Ka SDMA ka la kyntu ïa ki nongshong shnong ha ki jaka ba don jingma ba kin long kiba husiar bha bad ban kiar na ki jingleit jingwan ki bym donkam eh.
