Vijayawada, Nailar:
Haba pynpaw ba ka sorkar jong ka jylla Andhra Pradesh, ka la thaw ïa ka plan treikam ban pynkylla ïa ka shi lak ngut ki kynthei sha ki nongseng kam seng jam hapoh ka 8 tarik u Lber, 2026, u Myntri Rangbah ka jylla u N Chandrababu Naidu ha ka sngi Ba-ar u la pan jingkyrshan na ki nongtrei bank ban pynurlong ïa ka thong.
Haba long u nongïalam jong ka jingïalang kaba 232 jong ka State Level Bankers Committee (SLBC) ha Secretariat, u Naidu u la ong ba u la kyntiew ïa ka jingmut ‘One Family – One Software Engineer’ ha ka por ba la leit bad mynta ka ‘One Family – One Entrepreneur’ kaba buh hakhmat eh ïa ka jingpynkupbor ïa ki kynthei.
Ki kynthei ka DWCRA ki la ïoh ïa ka roi ka par da kaba ïoh ïa ka ram na ki bank, bad mynta ki bank ki dei ban wan shakhmat ban ai ram sha ki kynthei nongseng kam seng jam namar ka sorkar jylla ka la rai ban pynroi ïa ki MSME park ha baroh ki 175 tylli ki Assembly konstitwensi.
Ki nongtrei bank ki dei ruh ban pynshlur ïa ki samla bad ki longkmie da kaba pynïar ïa ka jingïarap pisa sha ki Startup kiba kham duna ka sut da kaba pynïasohlang bad ka Ratan Tata Innovation Hub, kaba la plie ha Mangalagiri bad phra tylli kiwei pat ki Centre ha jylla dang shen, u la ong.
U Naidu u la ai jingmut ba ki bank ki dei ban pynbha ïa ki polisi jong ki khnang ban ïadei bad ki jingdonkam jong ka pateng ban wan namar ba ka India kan sa buh jingeh ïa ka China bad ka US da kaba wanrah ïa ki jingpynkylla ha ka ïoh ka kot jong ka pateng ban wan. Ka sorkar pdeng ka wanrah ruh ïa ki jingpynkylla ha ka GST ban pynïadei bad ki jingdonkam ba mynta. Ki nongtrei bank ki dei ban long ki paralok jong ka prokram P4 ba la sdang da ka sorkar jylla ban pyndap ïa ka jingïapher hapdeng kiba riewspah bad kiba duk, u la ong.
Haba ban jur ïa ka jingdonkam jong ki jingïalang jong ki bank kiba ïadei bad ka jingmih, u la kdew ïa ka jingpynslem ban mynjur ïa ki ram Kharif na ka bynta ki nongrep. Shiteng na ka aïom Kharif ka la dep, bad ki bank ki la dei ban ai ram ïa ki nongrep ha kane ka por namar kam don jingmyntoi ban ai ram ha kaba kut jong ka aïom rep, u la ai jingmut.
U Myntri Rangbah u la kyrpad ïa ki nongtrei bank ban pynïar ïa ka jingïatreilang lyngba ka jingai pisa na ka bynta ki jingtei bad ki projek pyntuid um. Ka sorkar ka thmu ban kyntiew ïa ka Andhra Pradesh kum ka jaka pynpoi marbam ban pynduna ïa ka jinglut jingsep na ka 14% kaba mynta sha ka Single Digit. Katto katne ki projek, kynthup ïa ka jingpynroi ïa ki kad liengsuiñ la shim ha ka jinglut kaba T.3 lak klur hapoh ka PPP mode, u la batai.
U Myntri Rangbah ka jylla u la kyntu ïa ki nongtrei Bank ban thaw ïa ka Financial District ha ka nongbah Amaravati. Ka sorkar ka la pynkhreh ban ai jaka, bad ki bank ki dei ban wan shakhmat ban buh ïa ki ophis jong ki ha Amaravati, u la ong.
U Secretary (Union Ministry of Finance) u Nagaraju u la ong ba ki nongtrei bank ha ka jylla ki treikam bha haba ïanujor bad kiwei pat ki jylla. U nongseng ïa ka Andhra Bank, u Bhogaraju Pattabhi Sitaramaiah Memorial Park, yn sa pynroi ha Machilipatnam, ong u Myntri Rangbah. Kum shi bynta jong ka Credit Plan kaba shisnem, ki bank ki la ai ram haduh 2,47,919 klur tyngka sha baroh ki bynta, kynthup T.94,666 klur na ka bynta ka rep ka riang, 49,831 klur na ka bynta ki MSME, bad 1,00,278 klur na ka bynta kiwei pat ki bynta.
