Kolkata, Nailar:
Ka Myntri Rangbah ka West Bengal, ka Mamata Banerjee, ha ka sngi Ba-ar, ka la kyrpad ïa u Myntri Rangbahduh ka ri, u Narendra Modi, ba un burom ïa ka shuki jong ka bad ka la ong, ba kam ju khmih lynti ba u Myntri Rangbahduh, un lehbeiñ ïa ka jylla baroh kawei, da kaba khot ïa ki briew jong ka, ki “nongtuh”.
Haba ïadei bad ki jingkren jong u Myntri Rangbahduh dang shen ha kaba u la pynpaw ba ‘ka jingbamsap, ki kam runar bad ka Trinamool Congress ki long kajuh ka jingmut’, ka Banerjee ka la ong, “Ngam khmih lynti ïa kane na u Myntri Rangbahduh. Nga burom ïa ka shuki jong u, hynrei u dei ruh ban burom ïa ka shuki jong ngi. Balei un ong, “Nga la pynsangeh ïa ka pisa namar ba ki don ki nongtuh ha Bengal?”
Haba kren ha ka jingïalang paidbah ha Dum Dum ha Kolkata ha ka 22 tarik Nailar, u Modi u la kynnoh, “Ka pisa ba ka sorkar pdeng ka phah sha ka sorkar West Bengal kam poi sha ki paidbah hynrei la bam lut da ki nongbud ka seng TMC.”
Haba pynlong ïa ka jingpyrshah kaba jur pyrshah ïa katei ka jingkynnoh, ka la ong ba ka dei ka “jinglehbeiñ” ïa ki paidbah ka West Bengal.
Haba kren ha ka prokram ha Burdwan ha ka bynta ba shaphang Sepngi jong ka jylla, ka Banerjee ka la kynthoh jur ïa ka sorkar pdeng namar ba kam shym la ai ïa ka pisa “ba dei hok bad ba dei ban ïoh” jong ka sorkar pdeng sha ka West Bengal. Ka la kynnoh ba ka “jingleh meinah” jong ka sorkar pdeng ka la buh ïa ka “jingkit kaba khia” ha ka pla tyngka jong ka jylla.
“Ha ka por jong ka jingsynshar jong ngi, ngi la lah ban pynbiang um 76% ha ki jaka nongkyndong bad 78% ha ki jaka sor. Ngi la pynlut palat T.38,000 klur ha kane. Ngi la ai jaka khlem jingsiew bad ruh ngi la pynneh pynsah ïa ka rukom treikam. Ngi dang donkam T.65,000 klur tam,” la batai bniah ka Banerjee.
Ka Myntri Rangbah ka jylla ka la kren shai ruh ba kan ym ailad ïano ïano ban lehbeiñ ïa ka West Bengal.
