Chennai, Nailar:
Ka Tamil Nadu hadien ba la sakhi, ïa ka jingbun jong ki khynnah kiba shah pynïathoh ha ka rta ba dang rit, ka la pyntreikam da kaba tyngeh ban tehlakam bad ban pynshitom pyrshah ïa ki nongpynkheiñ aiñ.
Kumba la sakhi ha ki snem ba la lah, ki la don palat 4 hajar tylli ki jingujor halor ka jingdon jong ki jingjia ba ju pynïathoh ïa ki khynnah kiba dang poh rta.
Wat la pyntip palat shihajar tylli ki jingpynïathoh ha ka rta ba dang khynnah, hynrei la pynrung tang 808 tylli ki jingujor ejahar, kiba bun na ki ki dei na ka bynta ki jingpynïathoh kiba la dep jia, la pynpaw ka dorkhas ba la mudui katkum ka RTI Act.
Ka Dindigul distrik ka la lamkhmat ïa ka jylla ha ka jingdon ki jingujor ba la ïoh (175 tylli ki jingjia), katba ka Namakkal ka la ïoh ïa ka jingbun tam ki jingpynïathoh ïa ki khynnah kaba la long (117 tylli).
Ki distrik jong ka thaiñ Sepngi ki la bat ym duna ïa ka lai tylli ki jaka ha ki san tylli ki kyrdan ba hakhmat eh na ka bynta baroh ar ki jingdon bun jong ki jingujor ba pynïathoh khynnah kumba la ïoh jingtip bad la ju don bun ki jingpynïathoh ïa ki khynnah ha ka por ba ki dang poh ka rta. Hadien sa ka Namakkal, kiba bun ki jingpynïathoh la pynlong ha Erode (62), Cuddalore (56), Dindigul (54) bad Coimbatore (46). Haba ïadei bad ki distrik kiba la ïoh bun eh ki jingujor, la bud ïa ka Dindigul da ka Namakkal (171), ka Theni (161), Cuddalore (150) bad ka Salem (143). Ha Tiruchy distrik, la ïoh pdiang haduh 103 tylli ki jingujor ha kaba 48 tylli ki jingpynïathoh la pynlong. Hynrei ha kaba ïadei bad kane ki la don tang saw tylli ki jingujor ejahar. “Ngi ïohi ïa ka jingbun ki jingpynïathoh khynnah hapdeng ki jaitbynriew ba shah iehnoh beiñ bad ki kynhun riewlum ha ki distrik kum ka Erode. Bun na kine ki jah khlem da pyntip, bad ka long kaba kongsan ba dei ban pyrkhat kyrpang ïa kine ki thaiñ,” ong u G Karuppasamy na ka kynhun READ NGO, kaba trei bad ki khynnah ha Erode.
Ki nongïakhih ban pynïoh ïa ka hok jong ki paidbah, ki la kynnoh ruh ba ka jingbun jong ki khynnah kiba shah pynïathoh ha ka rta ba ki dang rit ka la long ha Tamil Nadu ka lah ban long kaba kham bun bha. Ka jingpynïathoh khynnah kam dei tang ka jingpynkheiñ ïa ka aiñ hynrei ka dei ka jingshah lehbeiñ ha ka jingsngew, ha ka met bad ha ka jingmut jingpyrkhat kaba pynduh ïa ka hok jong ka jinglong bad jingsngewbha jong ki khynnah.
