Patna, Nailar:
U nongïalam jong ka seng Bharatiya Janata Party (BJP) u Krishna Singh Kallu, ha ka sngi Thohdieng, u la ïathuh ba la ujor ejahar ha ki pulit pyrshah ïa u Rahul Gandhi, nongïalam jong ka seng Congress, hangne ha Patna, halor ka jingkynnoh ba u la “pyndonkam ïa ki kyntien pynjah burom” pyrshah ïa u Myntri Rangbahduh u Narendra Modi.
U nongïalam ka BJP u la khot ban sangeh noh ïa ka jingïalang jong ka liang pyrshah pyrshah ïa ka jingkynnoh ba la “tuh vote” ha kane ka jylla ba pynlong ïa ka jingthep vote.
Lyngba, u nongïalam ka ïingdorbar Lok Sabha u Rahul Gandhi, ki jingkren beiñ pyrshah ïa u Modi bad u Myntri ka tnat ki kam pohïing jong ka sorkar pdeng u Amit Shah ki dang ïai bteng ban mih. Ha kane ka sngi, ha Darbhanga, ha ka rynsan kaba la pynitynnad jong ka kynhun INDIA, ka la mih ka jingkren pyrshah ïa ka kmie jong u Narendra Modi, ka long kaba khlem akor haduh katta katta. La pynbna ïa ki jingkren beiñ ha ka kyrteng jong ka briew ka bym don shuh ha ka pyrthei. Lada don kiba lehbeiñ ïa ka kmie jong ngi, ngim lah ban shah,” la ong u nongïalam ka BJP ha ki lad phah khubor ha ka sngi Palei.
Katkum ka jingong u Kallu, ki pulit ki la ujor ejahar ha kaba ïadei bad kane ka kam ha Gandhi Maidan Police Station ha Patna. Utei u nongïalam ka BJP u la pynskhem ruh ba ki paidbah ka Bihar kin ym ailad ba ka jingïalang jong ka kynhun INDIA kan long ha katei ka jylla.
“Mynta ka sngi, ngi la wan sha Gandhi Maidan Police Station bad ngi la ai ïa ka aplikeshon ban shim ïa ki sienjam katkum ka aiñ pyrshah ïa u Rahul Gandhi, ha kaba la ujor ïa ka ejahar ha Gandhi Maidan PS. Ngin ym ailad ïa ka prokram jong u Rahul Gandhi, ba kan long ha Patna. Ki paidbah ka Bihar, kin ym ailad ba kan jia kumta,” u la ong.
