New Delhi, Nailar:
Ka India bad ka Japan ha ka sngi Thohdieng ki la pynrem jur ïa ka jingshah thombor ha Pahalgam bad ki la khot ïa ki nongleh, ki nongpynïaid, bad ki nongbei tyngka jong kane ka kam kaba shyrkhei ban pynngat ha ka aiñ khlem da pynslem.
Ha ka kyrwoh ba la pynmih lang hadien ka jingïakren ha ka Summit hapdeng u Myntri Rangbahduh ka ri u Narendra Modi bad u Myntri Rangbahduh jong ka Japan u Shigeru Ishiba, kine ki ar tylli ki ri ki la khot ruh ïa ka jingïatreilang pyrshah ïa baroh ki kynhun lehnoh bad ki kynhun lehnoh ba la buh kyrteng ha ka UN, kynthup ïa ka Lashkar-e-Taiba (LeT), ka Jaish-e-Mohammad (JeM) bad ki kynhun kiba mih ha ka kyrteng jong ki.
“Ki arngut ki Myntri Rangbahduh ki la kynthoh bad pynrem jur ïa ki kam lehnoh bad ki kam pyntriem ba shyrkhei ha baroh ki dur bad ki jingpynpaw jong ki, kynthup ïa ki kam lehnoh ha khappud,” ong ka kyrwoh ba la phah lang.
Ki la pynrem da kaba tyngeh ïa ka jingthombor jong ki lehnoh ha Pahalgam, Jammu & Kashmir ha ka 22 tarik, Ïaïong, bad ki la shim ruh ïa ka kaiphod jong ka UN Security Council Monitoring Team Report jong ka 29 tarik, Naitung, ha kaba ki la ïakren halor ka The Resistance Front (TRF).
U Modi, u pynshai ba ka TRF, ka la shim ïa ka jingkitkhlieh, halor katei ka jing thombor, kaba la shim ïa ka jingim jong ki 26 ngut ki briew.
U Ishiba u la kdew ïa kane da ka jingsngewkhia.”Ki la khot ïa ki nongleh, ki nongpynïaid, bad ki nongbei tyngka halor kane ka kam pyntriem ban pynngat ha ka aiñ khlem da pynslem,” la ong ka kyrwoh.
“Ki la khot ruh ïa ki sienjam kiba ïatreilang pyrshah ïa baroh ki kynhun bad ki seng lehnoh ba la pynrung kyrteng ha ka UN, kynthup ïa ka Al Qaeda, ka ISIS/Daesh, ka Lashkar-e-Taiba (LeT), ka Jaish-e-Mohammad (JeM) bad ki nongmihkhmat jong ki, bad ban shim ïa ki sienjam kiba tyngeh ban pynduhjait ïa ki jaka rieh tngen jong ki lehnoh. Ki kam runar kiba ïaid lyngba ki ri, bad pynsangeh ïa ka jingleit jingwan jong ki lehnoh shabar pud,” ka la bynrap.
Ki arngut ki Myntri Rangbahduh ki la pynpaw ruh ïa ka jingkyrshan ïa ka jingsuk kaba hok bad kaba neh ha Ukraine katkum ki aiñ jong ka pyrthei, kynthup ïa ka UN Charter. Ki la pdiang sngewbha ïa ka jingpyrshang jong ki ri bapher bapher kiba dang ïaid shakhmat ban ïoh ïa ka jingsuk kaba hok bad kaba neh, la ong ka kyrwoh.
Ki la pynpaw biang ïa ka jingkular jong ki na ka bynta ka jingsuk bad jingshong suk ha Middle East, da kaba khot ïa baroh ki liang kiba ïadei ban pyni ïa ka jingpyrkhing, ban ïada ïa ki riew paidbah, ban kohnguh ïa ki aiñ jong ka pyrthei, bad ban kiar na kaba shim ïa ki sienjam kiba lah ban pynjur shuh shuh ïa ka jinglong jingman bad pynthut ïa ka jingshong suk shongsaiñ ha ka thaiñ, la ong ka khubor.
Da kaba pynpaw ïa ka jingsngewkhia kaba jur halor ka jinglong jingman jong ki briew ha Gaza, ki arngut ki nongïalam ki la ban jur ïa ka jingdonkam ban poi sha ka jingïateh kular hapdeng ki liang kiba ïadei ha kaba ïadei bad ka jingpyllait ïa baroh ki nongshah rahbor bad ka jingsangeh thma kaba kloi bad kaba neh, kumjuh ruh ban weng ïa ki jingeh kiba ktah ïa ka jinglong jingman.
