New Delhi, Nailar:
Ka kynhun jong ki lanot jong ki jingshah thombor ha ki lehnoh Naxal ha ka sngi Thohdieng ki la kyrpad ïa baroh ki dkhot jong ka Parliament ba kim dei ban kyrshan ïa u kyrtong Vice President ba la kyrshan da ka liang pyrshah, u B Sudershan Reddy, da kaba kynnoh ba u dei u briew uba la pynsangeh ïa ka “jingïakhih jong ki paidbah” pyrshah ïa ki lehnoh ba shyrkhei ha ka por ba ki la jan duhjait noh.
Haba ai jingkren ha ka jingïalang bad ki nongthoh khubor hangne, ki lanot kiba ngat ha ka jingshah thombor jong ki Naxal, hapoh ka lama jong ka Bastar Shanti Samiti (BSS), ki la kynnoh ba namar ka jingbthah jong u Reddy kum u nongbishar jong ka Supreme Court ha kata ka por ban pynkut noh ïa ka Salwa Judum, ka jingïakhun jong ki kam shym la pyntlot hynrei ka la pynjot ruh ïa ka jingim jong kiba bun.
Ha u bnai Nohprah, 2011, u Justice Reddy jong ka Supreme Court u la rai ba ka jingpyndonkam ïa ki samla riewlum kum ki pulit ophisar bakyrpang, la ki khot ki ‘Koya Commandos’ ne ki Salwa Judum, ha ka jingïakhun pyrshah ïa ki lehnoh Maoist ka long kaba be-aiñ bad ka long pyrshah ïa ka Riti Synshar, bad u la hukum ba dei ban pynduh tiar ïasiat mardor ïa ki.
“Haba la ai bor ïa ka Salwa Judum, ki Naxal kim shym la tlot tang hynrei ki la jan duh jait noh. Hynrei namar ka hukum jong u Reddy kum u nongbishar jong ka iingbishar bahakhlieh duh ha kata ka por, ki Naxal ki la nang shlur bad ki la kylla long ka jingpynmynsaw kaba jur bha,” la ong u Jairam, u nongpynïaid jong ka BSS.
Hapoh ka Salwa Judum, ka sorkar Chhattisgarh ka la thung ïa ki samla riewlum kum ki pulit ophisar bakyrpang ban ïaleh pyrshah ïa ka jingma jong ki Naxal. Ha ka hukum jong u snem 2011, ka ben jong ka Supreme Court, kaba kynthup ruh ïa u Justice Reddy (retd), ka la ong ba ka jylla kam lah ban aiti ïa ki kam shabar sha ki nongpeitngor ki bym pat shah hikai, bad ka la pynsangeh ïa ki kam jong ki Salwa Judum.
U Shiyaram Ramtek, u nongshong shnong na Bastar, u ong ba lada “u Reddy, um shym la kyrshan ïa ki Naxal”, u khun jong u, un jin da la im mynta.
U khun jong u Ramtek u dei u nongrep, naba la pynshisha ba u la shah rahbor ha ki Maoist bad hadien pat la pynïap ïa u, u la ong.Uwei pat u lanot, u Kedarnath Kasyap, u la ong ba ki Maoist ki la pynïap ïa u para jong u, uba dei u pulit langrut.
“Ki Maoist ki la teh ïa ki kti jong u, ki la pynshitom ïa u bad ki la pynïap ha ka rukom kaba ishyrkhei bha. Lada ym shym la ai ïa ka hukum pyrshah ïa u Salwa Judum, ki Naxal kin jin da la phet noh na ka thaiñ jong ngi ha u snem 2014 bad u para jong nga un dang im,” u la ong.
Ha ka jingkyrpad jong ki, ki lanot, ki la ong, ba don kiba la duh ïa ka kjat ha ka jingbthei jong ki tiar pynbthei, don kiba duh ïa ka bor ïohi, don kiba la kheiñ u budlum katba don ruh kiba la duna dkhot met bad sah anna na ka daw ki kam thombor jong ki Naxal.
“Mynta, u briew hi uba la ai hukum pyrshah ïa u Salwa Judum u la shah jied kum u kyrtong ba ïakhun pyrshah ïa ka shuki Vice-President. Na ka bynta jong ngi, kane ka dei ka khyllipmat jong ka jingsngewsih kaba jur, kum ba kyllan mluh ha ki jingmong jong ngi. ka umsoh ba la khleh ha ki jingmynsaw jong ngi. Ngim ïahap bad kano kano ka jingmut jingpyrkhat ne seng saiñ pyrthei hynrei ngi kwah tang ïa ka hok,” ki la ong ha ka jingpynlait khubor.
Ka ilekshon Vice-Presidential kan sa sdang ha ka 9 tarik, Nailur. Katba u Reddy u la long u kyrtong jong ka kynhun pyrshah na ka bynta kane ka shuki, u C P Radhakrishnan u dei u kyrtong jong ka kynhun NDA kaba bat ïa ka jingsynshar.
