Shillong, Nailur 01
Ka Mawtneng U.P&SS kaba na Ri-Bhoi District kan sdang ïa ka jingïalehkai kaba nyngkong ha ka Under-15 Boys jong ka 64th International Subroto Mukherjee Football Cup 2025 pyrshah ïa ka kynhun kaba na Gujarat ha ka sngi Ba-ar ha Bengaluru.
Kane ka kynhun kaba la mihkhmat ïa ka Jylla, ka la don ha ka Pool-B kaba kynthup lang ïa ka Uttarakhand bad ka Sainik School.
Hashwa ba kan mih na kane ka nongbah, katei ka kynhun hapoh ka jingïalam u Bah Ïohborlang Jalong ka la ïoh ban kilanmet bha ha kane ka nongbah namar ka jingbym biang ki jaka ïalehkai phutbol ha ka thaiñ Ri Bhoi. Te kumta la khmih lynti ba kan lah ban ïalehkai bha ha katei ka lympung khnang ba ka lah ban wanrah burom ïa ka Jylla hi baroh kawei.
Kiwei pat ki jingïalehkai kiba katei ka kynhun ïalehkai ka Jylla kan ïakhun kin long pyrshah ïa ka Uttarakhand ha ka 3 tarik bad ha ka sngi kaba bud ïa ka Sainik School.
Lah ban kdew ki la don 34 tylli ki kynhun ki ban ïashim bynta ha kane ka lympung ha kaba la phiah ha ki phra tylli ki Pool. Te kumta ki kynhun ki ban wan ha ki kyrdan ba hakhlieh na kitei ki Pool kin ïoh rung sha ka quarter final kaba la buh ban long ha ka 8 tarik, katba ka semi final ha ka 9 tarik bad ka final kan long ha ka 11 tarik mynta u bnai.
