Patna, Nailur:
U President ka seng Samajwadi Party (SP) uba dei ruh u Myntri Rangbah barim ka Uttar Pradesh u Akhilesh Prasad Yadav u la pynskhem ba ka Bharatiya Janata Party (BJP) kan sa shah weng noh na ka bor ha Bihar ha ka ilekshon sha ka ïing dorbar thawaiñ ka jylla ka ban wan.
Haba kren sha ki lad pathai khubor mar ïa poi ha kad liengsuin ha Patna, u Akhilesh u la ïathuh ba u don ha Bihar ban ïashim bynta ha ka Voter Adhikar Yatra kaba dang ïaid shakhmat, ka jingïalap kaba thmu ban ïada ïa ka hok thep vote jong ki nongshong shnong.
U la pynpaw ïa ka jingkmen ïa ka jingkynthoh paidbah kaba jur kaba ka Yatra ka la ïoh.
“Baroh arngut u Rahul Gandhi (Congress) bad u Tejashwi Prasad Yadav (RJD) ki la pynpaw pyrthei ïa ki jingbym ïahap ha ka Special Intensive Revision (SIR) jong ka thup kyrteng nongthep vote ba la pynïaid da ka Election Commission (EC) ha Bihar.Nga don hangne ban ai ka jingkyrshan,” u la ong.
Haba kylli halor ka jinglong jingman jong ka saiñ pyrthei ha Bihar, u Akhilesh u la kynthoh, “Ngi la beh noh ïa ka BJP na Awadh. Mynta, yn sa beh noh ïa ka na Magadh (Bihar).”
U la ther tyngeh ïa ka Election Commission, da kaba kynnoh ba ka leh kum ka “Jugaad Aayog” ïa ka sorkar BJP.
“Ki paidbah ka Bihar kin pynlong la ka jong ka SIR jong ka Election Commission”, u la ong da kaba kynnoh ba ka BJP ka pyrshang ban knieh noh ïa ki nongshong shnong ïa ka hok thep vote jong ki kaba la pynskhem da ka riti synshar ka ri.
“Ngin ïada ïa ka Riti Synshar ha kano kano ka rukom. Ka Voter Adhikar Yatra ka dei ka jingïakhih ban ïada ïa ka hok tynrai ban thep vote. Ym don mano mano ba lah ban nud ban shim noh ïa kane”, u la pynskhem da kaba bynrap ba ki paidbah kin pynpoi ïa ka khubor kaba tyngeh sha ka BJP ha ka ilekshon.
U Akhilesh u la pynpaw ruh ïa ka jingeh jong ka jingwan buhai shnong na Bihar, da kaba kynnoh ïa ka jingbym don ki lad kamai ha ka thaiñ.
U la ïaroh ïa u nongïalam ka RJD u Tejashwi Yadav uba la lah ban pynmih kam ha ka por ba u long kum u Myntri Rangbah ka jylla ha ka sorkar Grand Alliance bad u la pynpaw ka jingkyrmen ba u Tejashwi un ïarap ban teh lakam ïa ka jingwan buhai shnong lada dang ailad.
Haba kynthoh pyrshah ïa ka BJP, u Akhilesh u la batai ïa ka kum ka seng kaba pyndonkam bakla ïa ki seng ba la ïatreilang jong ka tang ban bret noh ïa ki ynda la pyndep ïa ki thong jong ka.
Haba la kylli halor ka jingkren beiñ kaba la kynnoh ba la pyndonkam pyrshah ïa u Myntri Rangbahduh ka ri ha ka por ba pynlong ïa ka Voter Adhikar Yatra ha Darbhanga, u Akhilesh u la pynkynriah noh sha u Myntri Rangbah ka Uttar Pradesh, u Yogi Adityanath.
“Phi la ïohsngew ne em ïa u Yogi Adityanath ? Ka ktien aïu kaba u pyndonkam?” u la jubab.
