Aizawl, Nailur:
Kumba la buh jingkheiñ la ong ba ka jylla Mizoram, ka don haduh 351 ngut ki briew, kiba ïap na ka daw jong u drok, ha ki san snem ba ladep, ba kynthup ïa 46 ngut ki kynthei, ong ka myntri ka tnat Excise bad Narcotics jong ka jylla, ka Lainghinghlova Hmar, ha ka taïew ba la lah.
U Hmar haba jubab ïa ka jingkylli na u nongthaw aiñ ka Mizo National Front u K Laldawngliana u la ong ba 78 ngut ki jingïap ki dei na ka daw jong ka jingdih drok Heroin, katba 273 ngut ki dei na ka jingdih buaid drok hapdeng u snem 2020 bad ka 8 tarik Nailar, 2025.
Ki la ïap ki don ha ka rta kaba 19 haduh 57 snem. Ka jingïap kaba bun tam ka dei ha u snem 2023 ha kaba ki don 76 ngut kiba ïap.
Naduh u bnai Kyllalyngkot haduh ka 8 tarik u Nailar jong une u snem, ki don 51 ngut ki briew kiba la ïap, ba kynthup ïa hynriew ngut ki kynthei, namar ka jingdih drok.
Napdeng ki 11 tylli ki distrik, jong ka Jylla, ka Aizawl ka dei kaba bun eh kiba ïap haduh 274 ngut, bud sa ka Lunglei da 69 ngut, bad ka Champhai da 58 ngut.
Ka tnat Excise and Narcotics ka la ïoh kurup haduh 212.987 kg u drok, 568.991 kg u drok, bad 1,566.662 kg u kyiad, kaba shongdor kumba 152.43 klur tyngka, katba 4,400 ngut ki briew ki dei kiba la shah pynngat hapoh ka Narcotic Drugs and Psychotropic Substances Act ha kane ka por.
U Myntri ka tnat ki kam pohïing ka jylla u K Sapdanga u la ong ba yn sdang ïa ka jingpynkhreh kaba ïatreilang kaba kynthup ïa ki pulit, ki heh jong ka tnat lum khajna, bad ka seng Young Mizo (YMA) ban tehlakam ïa ka jingdih drok bad ka jingshalan tuh, kaba ju pynmih ïa kiwei pat ki kam runar.
Ka Mizoram ka ïakynduh ïa ka jingma kaba ïai bteng na u drok namar ka jingdon jong u pud u sam bajrong 510 kilomitar bad ka Myanmar bad ka jingjan bad ka “Golden Triangle,” ka thaiñ kaba pawnam bha ha ka jingpynmih drok kaba kynthup ïa ka Myanmar, Thailand bad Laos.
