Bengaluru, Nailur:
Ki nongïalam ka BJP ha ka lah sngi U Blei ki la kynthoh ïa ka sorkar jylla halor ka jingthaw ïa ka kynhun Special Investigation Team (SIT) ban tohkit halor ka jingkynnoh ba ka la don ka jingtep paidbah ïa ki metïap ha Dharmasthala, da kaba kynnoh ba katei ka jingleh ka dei kaba don jingthmu ha ka saiñ pyrthei bad kam don satia ki sakhi satar.
Haba kren sha ki paidbah kiba la ïalum lang ha katei ka shnong ba don ka jaka mane blei na kylleng ka jylla, u President ka BJP ha ka jylla u BY Vijayendra u la kynnoh ba ïa ka kynhun SIT la thaw tang halor ka jingujor na “u nongïaid lynti” khlem kano kano ka jingtohkit shwa.
U la kynthoh ba ka sorkar ka pyrshang ban pynsniew ïa ka nam jong ka temple Dharmasthala bad u la maham ruh ban tynjuh ïa ka jingïaishah jong ki Hindu. “Ym dei ban kheiñ sting ïa kane ka jingïaid paidbah. Ngin ym shongthait tad haduh ban da paw pyrthei ïa kiba shisha kiba donkti. Ngi dawa ïa ka jingtohkit kaba bniah da ka NIA ne CBI”, la ong u Vijayendra.
U Vijayendra u la ong ba ka Congress kam shym la lah ban pynthikna ïa ka jingbishar hok ïa ki Hindu. “Man la ka por ba u Siddaramaiah u don ha ka bor, ki jingshah thombor ha ki temple jong ki Hindu ki kiew bha”, u la ong.
“Ki jingkynnoh pyrshah ïa ka Dharmasthala kim dei tang ki bym don nongrim hynrei ki dei ki jingthmu ba thmu ban pynpra ïa ka jingïatylli jong ki Hindu. Ka sorkar ka la pyndonkam da ki kam ba ïadei bad ka saiñ pyrthei”, la kynnoh u Vijayendra.
U Myntri ka sorkar pdeng uba dei khmih ïa ka tnat Consumer Affairs, Food and Public Distribution u Prahlad Joshi u la pynkam ba u briew uba buhrieh dur ïalade u dei u paralok jong ka seng Congress bad buh jingkylli kumno u briew u la lah ban mihkhlieh khlem da ai jingbit u Magistrate.
“Uei une u briew uba la deng mask uba la rung sha ka jaka tep?Balei ym shym la kem bad tohkit mardor ïa u?” U Joshi u la kylli, da kaba bynrap ba la pynsangeh noh ïa ka jingtih tang hadien ba kam shym la lah ban ai ïa ka jingmih kaba la kwah, bad haba ka sorkar ka la sdang ban ïakynduh ïa ka jingshah kynthoh.
U nongïalam ka liang pyrshah ha ka ïingdorbar thawaiñ ka jylla Karnataka, u R Ashoka, u la kam ba ki khubor pynïap briew ha Dharmasthala, ki la don mynta la palat arphew snem hynrei la shu kyntait beit namar ka jingbym don sakhi sabut. Haba pynpaw ïa ka jingïatylli bad ka jingdawa ïa ka hok na ka bynta ka Soujanya, u la ban jur ba ym dei ban pyndonkam ïa ka mukotduma jong ka ban pynjah burom ïa ka Temple.
