Bengaluru, Nailur:
Ka la don ka jingujor ejahar pyrshah ïa ki hynñiew ngut ki briew kiba la shah kynnoh, ba kynthup ïa lai ngut ki heh sorkar, ha ka mukotduma hapoh ka aiñ POCSO, ka jingkhang ïa ka jingshongkha khynnah bad ka SC/ST Prevention of Atrocities Act.
Ïa kane ka jingujor ejahar la buh hadien ka jingujor jong kawei ka khynnah kaba dang pohrta sha ka State Women’s Commission.
Ïa kine kiba la shah kynnoh la pynngat hapoh ki katto katne ki kyndon jong ka BNS, bad ka jingtohkit ka dang ïaid shakhmat.
Ha u bnai Rymphang, 2025, kane ka khynnah ka la thoh sha ki heh jong ka Ponnampet Women and Child Development na ka bynta ban pan jingïarap, da kaba kam ba ka la shah leh beijot bad shah pynïathoh shongkurim khynnah.
Ka la ïathuh ba ka don ha ka rta kaba 17 snem bad ka la pyndep ïa ka SSLC ha u snem 2024-25. Ma ka, ki kmie ki kpa jong ka, u mama bad ka hynmen ki la trei kum ki nongbylla ha kawei ka jaka jong ki briew kiba shong shnong ha ka thaiñ.
Ka la pynshisha da kaba ong ba ka la don jingïadei bad u mama jong ka.
Ka la kynnoh ruh ba u trai jaka u la leh beijot ïa ka bad ïa ka hynmen jong ka.
Shuh shuh u trai jaka bad ki kmie ki kpa jong ka ki la pynbor ïa ka ban shongkurim ïa u mama ha u Nohprah jong u snem 2024.
Hadien ba ka la pun khun, la kynnoh ba la beh kam ïa ka da u trai jaka. Ka la kha ïa i khun ha Gonikoppal Community Centre.
Ka la pynshisha da kaba ong ba kam lah ban ïoh ïa kino kino ki jingdonkam jong ka sorkar namar ba u trai jaka u la kurup ïa ki kot ki sla jong ka bad pyntrei ïa ka kum ka mraw.
Wat la ka la ujor sha ki ophisar ha Ponnampet, hynrei kam shym la ïoh jingkyrshan ei ei, bad ka la phah ïa ka jingujor sha ka Women’s Commission.
U Inspector Tulasi u la ujor pyrshah ïa ki hynñiew ngut kiba la shah kynnoh ha thanat Srimangala, ha kaba la ujor ïa ki kmie ki kpa jong ka, u kurim jong ka, u trai jaka, ki heh ophisar jong ka Ponnampet, u ophisar ba dei khmih ïa ka koit ka khiah jong ka Gonikoppal Community Centre, bad uwei u ophisar jong ka koit ka khiah ha Kodagu Institute of Medical Sciences.
La kynnoh ba ki ophisar ka Forensic bad ki ophisar ka koit ka khiah ki la pynmih ïa ki kot ki sla thok ban buhrieh ïa ka rta jong ka khynnah ha ka por ba ka kha khun.
